Kin don haduh 4164 ngut kiba la pynkhreh ban ïakhun ïa ka eksam NEET-UG la sngi U Blei

Shillong, Jylliew 19: Ka sorkar jylla ka la pynlong ïa ka jingïalang bishar kam ban khmih ïa ki jingpynkhreh ïa ka jingïaid beit bad ka jingjop jong ka jingpynlong ïa ka National Eligibility-cum-Entrance Test (NEET-UG) 2026, kaba la buh ban pynlong da ka National Testing Agency (NTA) ha ka 21 tarik mynta u bnai, bad ïa kane ka jingïalang la pynlong ha Committee Room-III jong ka Additional Secretariat Building, Shillong bad la ïathuh ba kin don haduh 4,164 ngut ki ban ïakhun ïa kane ka eksam ka ban long ha ka sngi U Blei.
Ïa ka jingïalang la pynïaid da u Bah B. Mawlong, IAS, Secretary ka sorkar Meghalaya, ba khmih ïa ka tnat Health & Family Welfare ha kaba la pynlong ha ka sngi Thohdieng.
La ong ba ha kane ka jingïalang bishar kam, na ka liang u Bah Mawlong u la khmih ïa ki jingpynbeit ba la buh hakhmat da ki bor pynïaid distrik bad kiwei ki nongpynïaid kiba ai jaka ban long ki centre ban pynlong ïa kine ki eksam ha ki district. U la banjur ïa ka jingdonkam ban pynthikna ba ka jingpynlong ïa ka eksam kan long ha kaba suk ba saiñ, kaba shngaiñ bad u la kyntu ïa baroh ki tnat bad ki agency ban pynneh ïa ka jingïatreilang kaba jan ban ai ïa ka sawdong sawkun kaba suk ïa kiba ïaleh eksam.
Ha kane ka jingïalang na ka liang ki ophisar na ki district bapher bapher ki la batai ïa u nongpynïaid kiei ki kam ba ki la shim ban pynïaid beit ïa kane ka eksam, ba kynthup ka jingpynbiang ki bor ai jingïada, ka kit ka bah, ka jingpynbiang ïa ka jingsam boding, ka jingbuh ïa ki bor pahara bad kiwei pat ki jingpynkhreh.
Ha ka jingïalang la ïathuh ba ki don haduh 14 tylli ki examination centre kiba la buh ha kylleng jong ka jylla Meghalaya na ka bynta ban pynlong ïa ka NEET-UG 2026. Na kine, 10 tylli ki centre ki don ha Shillong, 2 tylli ha Tura, 1 ha Jowai bad kawei ha North Eastern Police Academy (NEPA) campus hajan Umiam Ri-Bhoi district.
Shuh shuh la ïathuh ba baroh kiba thoh eksam ki long 4,164 ngut kiba la thmu ban leit ïakhun ïa kane ka eksam ha ka sngi U Blei, ka 21 tarik mynta u bnai, 2026.
Ha kane ka jingïalang la wan ban ïashim bynta da Dr S. Rajan, Deputy Secretary, Ministry of Education, Government of India; Dr R. Marak, MCS, Joint Secretary, Health & Family Welfare Department, Government of Meghalaya; bad ki ophisar na ki bor pynïaid distrik bad kiwei pat ki tnat kiba dei ban don bynta.
Shuh shuh na ka liang nongïashim bynta ki la pynpaw ka jingsngew shaniah ba baroh ki jingpynkhreh kiba kongsan ki dei ban don ha ki jaka ban pynthikna ïa ka jingïaid beit ka eksam NEET-UG 2026 ha kylleng ka jylla.