Haduh 47 tylli ki longïing ba shah pynjulor bor mariang ladep siew pisa ka KHADC: CEM

Shillong Jylliew 19: Haduh 47 tylli ki longïing kiba la mad ïa ki jingshah lynshop jong ki bor ka mariang kiba hab hapoh u pud u sam jong ka KHADC la dep ban ai jingïarap pisa kaba dei jong u snem 2025-26 bad kine kidei kiba la wan lyngba ki jingbuh jingtyrwa jong ki MDC, ïathuh u CEM ka KHADC u Bah Winston Tony Lyngdoh hapoh ka Sngi kut noh jong ka dorbar lyiur jong ka Council ha ka sngi Thohdieng.
Ïa kane u CEM u la jubab ïa ka jingkylli ba la wanrah da u MDC ka Mairang u Bah E L Nongrang ha ki kynta jingkylli.
Ha kaba ïadei pat ki jong u snem 2026-27 naba ka don ka vote of account kaba hap ban siew tulop ïa ki nongtrei KHADC ym pat lah ban siew, hynrei na ka liang u CEM u la kular ba hadien ba la kut ka dorbar lyiur yn sa lah ban pynlait ïa ka pisa kaba donkam kiba wan katkum ki jingtyrwa kiba ïaid katkum ki jingpynbiang ïa ki kot ki sla.
U CEM u la ïathuh ruh ba ka jinglut baroh kaba la siew ïa kitei ki 47 tylli ki longïing ka la kot sha ka T. 3.47 lak ha kine ki snem ba la dep.
Haba jubab shuh shuh ïa ki jingkylli la ka don ne em ka skhim ïa kum kine ki longïing ba la shah ktah ne ka Natural Calamity Scheme ne kaba la buh da ka dor, na ka liang u CEM u la ïathuh ba ïa ki minor expenditure ka long T. 4 hajar shaneng bad ïa ki major expenditure ka long T. 15 hajar shaneng.
Halor ka jingbuh ïa ka por ban pynlait ïa ka pisa u CEM u la batai ba ka shong beit da ka jingïoh ïa ki proposal kiba poi bad kiba la pynbiang ïa ki kot ki sla, ka KHADC hapoh 10 Sngi ka la pynlait ïa ka pisa na ka Emergency fund.
Haba ïadei pat bad ki jingjia shah lynshop ki bor mariang kiba ha u snem 2026-27, u CEM u la ïathuh ba ki MDC ki lah ban phah ïa ki proposal naduh u bnai Ïaïong ïa ki jingjia bapher bapher naduh ki jingshah pynjulor ki jaka rep bad kiwei kiwei ki jingshah pynjulor.