Nongstoiñ, Jylliew 18: Ka synjuk ki Rangbah shnong ka thaiñ Tynghor kiba kynthup ïa ki Khasi bad Garo kiba na katei ka thaiñ, ha ka sngi palei ki la pynlong ïa ka jingïalang paidbah ha madan shnong Tynghor, ban pynpaw ka jingsngewnguh ïa u bah Prestone Tynsong symbud myntri rangbah ka jylla Meghalaya, u ba la pynbna ban pynskhem ïa ka Rimuliang C&RD Block ban buh beit ha ka shnong Tynghor.
Katei ka synjuk ka la ong ba hadien ba la ïohi da ki dur khih lyngba ki lad pathai khubor, ba ha ka jingïalang paidbah ïa kaba la pynlong dang shen ha sor Rambrai, u bah Prestone Tynsong u la kren ïa kitei ki kyntien ba ïa ka ophis Rimuliang C&RD Block yn buh noh ha Tynghor. Kumta, ka synjuk ka la sngewkmen palat namar kumba ka synjuk ruh ka la ju ïakhun tyngeh ban pynïoh ïa katei ka ophis ha shnong Tynghor.
Kum ka dak jong ka jingsngewnguh ka synjuk ka la phah ïa ka kyrwoh sngewnguh lyngba u S.Momin uwei na ki riew rangbah ka thaiñ Tynghor bad u samla Distarborlin Wanniang. Kitei ki riew paidbah kiba kyrshan ban don C&RD Block ha Tynghor ki dei kiba na ki saw tylli ki Hima kiba kynthup ïa ka Hima Nongmynsaw, Hima Jyrngam, Hima Rïangsieh bad Hima Nonglang.
Lah ban pynkynmaw ba ïa katei ka Ri Muliang C&RD Block, naduh ba la plie paidbah ha Nonglang, haduh mynta ka dang don hapdeng ka jingïakynad bad ka jingïatan tyllai bad ym pat lah ban pynshisha la kano ka kynhun kan ïoh. Hynrei la shu kut satang ha ki nia ki jutang katba ka kam kat haduh mynta mynne kam pat paw ei ei.
Lah ban kdew hangne ba dang shen ruh na ka liang ki paidbah ka Hima Nonglang ki la mih paidbah ban pynlong ïa ka jingïalang paidbah, ha kaba ka jingïalang ka la dawa ba dei ban pynneh beit ïa ka Block ha Nonglang kumba la plie mawnongrim naduh ka sngi kaba nyngkong eh.
Hynrei, hynne ka sngi palei pat na ka liang kine ki riew rangbah ki la ong ba ka Tynghor ka dei ka jaka pdeng kaba biang eh ban buh ïa ka Ri Muliang Block.Ki da kam ruh ba kumba u Bah Prestone Tyndong u la ong ha Rambrai halor kane, kumta ym lah ban pynkylla.
Haba kren sha ki lad pathai khubor u bah Distarborlin Wanniang u la ong, “Ngim lah ban khlem da ai khublei ïa ka sorkar lyngba u BDO u ba la wan ha Tynghor ha ka 10 tarik Risaw 2024, u ba la shimkhia bad sngap ïa ka sur jong ki paidbah”, bad bynrap, “Ka jingdawa jong ngi hapoh ka jingïalam jong u sordar ka long kaba shongnia bad baroh ki nongïalam jong ki saw Hima ngi ai jingkyrshan ïa ka jingleh u sordar, namar u la maitphang ïa ka ophis kaba skhem jong ka Block hangne ha Tynghor”.
“Ka shnong Tynghor ka dei kaba hamar pdeng tam lada phai ha baroh ki liang bad ki shnong kiba hap ha kane ka thaiñ. Na Athiabari sha Tynghor ka don 17 kilometer, na Nonglang sha Tynghor ka don 17 kilometer. Kumta ngi sngewthuh biang biang ba ka Tynghor ka dei kaba kham biang tam ban buh ïa ka ophis jong ka C&RD Block kaba skhem”.
“U Dy CM dalade u la ong ha ka jingïalang bah ha Rambrai ha ka 4 tarik Jylliew 2026, ba ïa ka ophis kaba pura yn buh beit ha Tynghor.Kumta na ka liang jong ngi, ngi mih shakhmat mynta ban pynpaw ïa ka jingai ka kti kamon ka kti kadiang ban ai jingkyrshan bad snohktilang bad ka sorkar halor ka jingthmu ban buh C&RD Block ba puira ha Tynghor”, ong u Distarborlin Wanniang.
