Da ka jingïakhih ba tyngeh ngi la pynkhreh lada ka sorkar kam jubab kloi halor ka Ri Muliang Block: JAC

Nongstoiñ, Jylliew 16: Shisngi hadien ba ka Joint Action Committee Rimuliang C & RD Block ki la pynlong ïa ka jingïaid paitbah da kaba rah lama ïong ryngkat ka jingïalang paitbah halor ka jingthmu jong ka sorkar ban pynkynriah ïa ka Ophis jong ka Rimuliang C & RD Block na ka shnong Nonglang ka la pynlong ïa kiwei pat ki nongshong shnong ba marjan ki ba hap ha kiwei pat ki C & RD Block ba kin ai ka jingkyrshan ïa katei ka jingrah lama ïong jong ki paitbah ban pyrshah ïa ka jingleh khlieh shrieh jong ka sorkar.
Kumta ha ka lah sngi u Blei ka 15 tarik Jylliew u Myntri sorkar uba dei peit ïa ki C & RD Block u la khot ïa ki nongïalam ka Joint Action Committte Rimuliang C & RD Block ha ophis treikam jong u ha Shillong ban ïakren halor katei ka mat. Hadien ba ki nongïalam ka Joint Acvtion Committee ki la wan phai na Shillong la ïoh ban ïakren bad ki lyngba ka telephone ha kaba u Bah D.A Lyngdoh u la ïathuh ba katei ka jingkhot ïakren jong utei u Myntri kam shym poi shano shno ruh bad kam shym la pynhun ïa ka jingkwah jong ka Joit Action Committee bad ki paitbah namar ba u la ong ha ki ba un sa ïakynduh shuwa ïa u Myntri Rangbah bad u Synbud Myntri Rangbah ban ïa kren halor katei ka mat.
Halor katei ka jingkhot ïakren jong utei u Myntri ki nongïalam ka JAC ki la ong ba ka long kaei kaei kaba sngew jem daw bad kaba bym sngewlah ban pdiang lada ka sorkar kan shu kheiñ beiñ ïa ki paitbah jong ki hynriewphew ar tylli ki shnong ba ki dei ki khunlung. Ki la ong ruh ba ka long kaei kaei ka bym lah ban pdiang ba kat u Myntri Rangbah ka jylla un shu wan ban thoh ban shukor bad ban pynbiej kai ïa ki paitbah da kaba shu ai bad shim noh pat ïa kaei kaba la ai.
Ki la ong ruh ba ka jingdawa ban rah noh ïa katei ka Block ophis sha ka shnong Tynghor ka dei tang namar ba tang nar ba ka don ka jingdawa jong kawei ka kynhun kaba la ïadon bynta lang da u Bah Nassar Syiem Jahnoh Sirdar ka hima Jyrngam bad kaba la suba jur ruh ba u.R. G. Momin MLA bad u Bah Lurshai Kharbani MDC ki ïadonktilang. Nalor kata kitei ki nongïalam ka JAC ki la ong ruh ba ka sorkar ka dei ban jubab noh kloi katba lah bad kan pynshai ruh la kan rah ne kan pynneh ïa ka Block ophis jong ka Rimuliang ha ka shnong Nonglang kum ka Headquarter namar kat kum ka jingtip jong ki ïa ka tender na ka bynta ban tei ïa ka main building ruh lah dep khot naduh ki bnai ba la dep. Nalor kata ki la ,ong ba lada ka sorkar ka dang pynslem ban jubab na ka liang ka JAC bad ki paitbah jong ki hynriewphew ar tylli ki shnong ki long kiba la pynkhreh ban pynlong da ki jingïakhih ba tyngeh wat lada kan poi haduh uno uno u pud ruh namar ka jingdaw jong ki kam dei kaba bakla hynrei ki dawa ïa ka hok kumba ka sorkar ka la wan ban buh ïa u maw nongrim bad plie ruh ïa ka ophis treikam ba shipor.