Shillong, Jylliew 16 : U MLA ka Mawkynrew Constituency, u Bah Banteidor Lyngdoh, ha ka 15 tarik u Jylliew 2026, u la plie ïa ka Multi-Purpose Hall jong ka Sacred Heart Secondary School, Thynroit.
Ïa kane ka hall la tei lyngba ka skhim na ka Chief Minister’s Special Development Fund (CMSDF) kaba kot 6.50 lak tyngka
Ha ka jingïalang plie la ïadonlang da u Rev. Fr. Suresh Kagoo, Parish Priest ka Good Shepherd Parish Jongksha, u Sordar Shnong Thynroit, u Bah Harkin Warjri, ki nongïalam Balang, ki longkmie longkpa bad ki samla shnong.
Haba kren ha ka jingïalang, u Bah Harkin ula ai jingïaroh ïa u MLA namar ka jingtrei shitom jong u ban pynurlong ïa bun ki kam pynroi kiba ki paidbah shnong ki donkam.
“Kam dei ka sien kaba nyngkong ba u MLA ula kner jingïarap, hynrei ula ju ai jingïarap ha ki kam shnong kam thaw bad wat ha ki kam shimet jong ki paidbah”, la pyrto u Bah Harkin.
Na ka liang u Rev. Fr. Suresh ula pynpaw ka jingsngewkmen kaba khraw halor ka jingplie ïa kane ka hall kaba donkam bha na ka bynta ka skul bad ka shnong.
“Nga ai ka jingïaroh ïa u MLA bad kyrkhu ïa u ba un nang ïoh ka met kaba koit ba khiah khnang ba un lah ban wanrah shuh shuh ïa ki kam pynroi ha ka thaiñ”, la kdew u Rev Fr Suresh bad bynrap ba ka Hall kan long ka jingkyrkhu ïa ka Balang bad ka shnong, khamtam haba yn sa plie ïa ka Parish ba thymmai ha u snem 2027.
Haba ai jingkren kum u Kongsan, u Bah Banteidor Lyngdoh ula ai khublei ïa baroh kiba la ïa don bynta ha ka jingpyntrei ïa kane ka projek, khamtam ïa u Bah Soni Nongspung uba la pyntrei ïa ka hall.
Ula ong ba kane ka sngi ka long ka sngi kaba kyrpang namar ka jingangnud jong ka shnong bad ka skul ka la urlong.
U la pynkynmaw ruh ba ha ki snem kiba la dep ula ïohi ïa ki jingeh khamtam haba don ki jingïalang bad ki prokram.
“Kane ka la pynlong ia nga ban mang pisa lyngba ka CMSDF ban tei ïa kane ka hall namar ka jingdonkam kaba kyrkieh”, la ong u MLA.
Ula kyntu ïa ka shnong bad ka skul ban sumar bha ïa kane ka jingtei bad ban pyndonkam hok ïa ka na ka bynta ki kam shnong, ki kam Balang bad ki kam pule puthi.
Ula kular ruh ban dang ïai bteng ban trei lang bad ki nongshong shnong ban pynurlong ïa kiwei pat ki kam pynroi kiba dang sah.
Ka jingplie ïa kane ka Multi-Purpose Hall ka long kawei na ki sienjam ban pynkhlaiñ ïa ki jingtei ba donkam paidbah bad ban ai jingïarap ha ka liang ka pule puthi bad ka imlang sahlang ha ka shnong Thynroit.
