Donkam ban bud ryntih ïa ki kyndon ban ïada ïa ki nongthied lyngba ki rukom treikam ba ryntih: Dr. Wadamika

Shillong, Jylliew 13: Ïa ka prokram ai jinghikai kaba shisngi la pynlong halor ki Quality Standard bad ka BIS Certification na ka bynta ki Micro, Small and Medium Enterprise (MSME) ha Directorate of Commerce & Industries ha Shillong.
Ka prokram ka la pynïasoh lang ïa kumba 60 ngut ki nongsengkam sengjam, ki nongmihkhmat jong ki karkhana, ki heh sorkar bad ki riew shemphang ha ka liang ka teknoloji ban kyntiew ïa ka jingsngewthuh shaphang ki kyndon kiba ïadei bad ka jingbha, ki rukom ai syrnot bad ki rukom pynïaid ïa ka jingbha hapdeng ki MSME.
Ïa kane ka prokram la pynlong da ka jingthmu ban pynshlur ïa ki MSME ban shim ïa ki Indian Standard, ban sngewthuh ïa ki skhim BIS Product Certification, ban pyntreikam ïa ki Quality Management System bad ban pynkhlain ïa ka jingbud ryntih ïa ki kyndon aiñ.
Ka jingïalang ka la ai ruh ka rynsan ban ïakren markhmat hapdeng ki MSME bad ki riew shemphang na ki jaka kiba ïadei bad ki kam jingbha jong ki jingdon jingem.
La sdang ïa ka prokram da ka jingkren pdiang burom na ka Kong Aimeka Dkhar, Assistant Director ka Directorate of Commerce & Industries jong ka sorkar Meghalaya, kaba la ban jur ïa ka jingdonkam jong ka jinglong kaba bha ha kaba kyntiew ïa ka jinglah ban ïakhun bad ka jinglah ban ïaineh ki MSME.
Haba ai jingkren ha kane ka jingïalang, u Bah Moonlander Wanshong, Director jong ka Commerce & Industries jong ka sorkar Meghalaya, u la ban jur ïa ka bynta ba kongsan jong ki quality standard ha kaba kyntiew ïa ka jingmih jong ki karkhana, ka jingpdiang jong ki ïew ïa ki mar, bad ka jingkiew kaba jrong samoi jong ka kam.
U la pynshlur ïa ki nongseng kam seng jam ban pdiang ïa ki rukom shna mar ba la pynbeit ryntih bad ki skhim pynshisha ïa ka jingbha ban kyntiew ïa ka jingshaniah jong ki nongthied bad ka jinglah ban ïakhun.
U Shouvik Chanda, Director & Head, ka BIS Guwahati Branch Office, u la ai ka jingbatai shaphang ka Bureau of Indian Standards (BIS) bad ka bynta jong ka ha kaba kyntiew ïa ka jingbha, ka jingshngaiñ, bad ka jingïada ïa ki nongthied nongpet lyngba ka jingpynbeit ryntih, ka jingpeit bniah ïa ka jingïahap, bad ki kam pynshisha.
Haba ai jingkren halor ka jingdonkam jong ka jingbha bad jingshngaiñ na ka bynta ka koit ka khiah jong ki paidbah, ka Dr. Wadamika Lyngdoh, Deputy Commissioner of Food Safety (Technical), ka tnad ka koit ka khiah jong ka sorkar Meghalaya, ka la ban jur ïa ka jingdonkam ban bud ryntih ïa ki kyndon bad ban ïada ïa ki nongthied lyngba ki rukom treikam ba la pynbeit ryntih.
Ïa ka jinghikai halor ka BIS Product Certification Process bad ka Grant of Licence Procedure la pynlong da u Dr. Shasanka Sekhar Borkotoky, Consultant (Standardization Activities), BIS, bad u Jishnu Das, Standard Promotion Officer, BIS.
Ka jingïalang ka kynthup ïa ki rukom aplai, ki jingdonkam ba ïadei bad ki kot ki sla, ka jingtest ïa ki mar, ka jingpeit bniah ïa ka jingbud ïa ki kyndon, ka jingpeit bniah ïa ki karkhana, bad ki rukom ai laisen bad pynthymmai.
Ïa ka jingïalang ïamir jingmut halor ka Quality Management System (QMS) Certification la ai da u Shouvik Chanda, uba la batai bniah shaphang ki jingmyntoi jong ka jingpdiang ïa ki kam ban pynthikna ïa ka jingbha na ka bynta ban kyntiew ïa ka jingtreikam, ka jingsngewhun jong ki nongthied, bad ka jingtreikam jong ka seng.
Ki nongïashim bynta ki la ïoh jingmyntoi ruh na ka jingpyni ïa ka teknoloji da u Dr. Harekrishna Deka, Head (In-Charge), CIPET Guwahati, uba la ban jur ïa ki jaka test, ki jingshakri ba kyrshan ïa ka teknoloji, ki rukom pynthikna ïa ka jingbha, bad ki lad kyntiew ïa ki sap kiba lah ban ïoh da ki MSME.
Ka prokram ka la kut da ka jingïalang kylli jingkylli bad jubab, ha kaba ki nongïashim bynta ki la pan jingshai halor ka BIS certification, Indian Standards, Quality Control Orders (QCOs), ISO certification, bad ki jingdonkam ban test.
Ki jingïakren ki la plie lad ïa ka jingïakren kaba don jingmut hapdeng ki nongshim bynta ha ka kam karkhana bad ki riew shemphang ha ka teknoloji.
Ka prokram ka kyntiew ïa ka jingsngewthuh hapdeng ki MSME ha kaba ïadei bad ka BIS certification, Indian Standards, bad ki rukom pynthikna ïa ka jingbha.
La khmih lynti ba kan pynshlur ïa ka jingpdiang kham bun ïa ki kyndon ba bha, ban kyntiew ïa ka jingbud ryntih ïa ki kyndon, bad ban pynkhlaiñ ïa ka jinglah ban ïakhun jong ki MSME ha Meghalaya.