Leit ai jingkyrshan ki MLA ka East Jaiñtia halor ka jingshah thngan u Marshall S.B.Biam

Jowai, Jylliew 12: Ki ar ngut ki MLA jong ka East Jaiñtia Hills District kiba ïa u ma Kyrmen Shylla, uba dei u MLA bad Ex-Minister na ka Khliehriat LA Constituency bad ka kong Santa Mary Shylla ka MLA jong ka Sutnga-Saipung, hynin ka sngi ka 11tarik Jylliew ki la leit jngoh bad ai ka jingkyrshan ïa ka jingshong shahthngan jong u President ka JWOMSWA u ma Marshall SB Biam, kaba dang ïaid haduh mynta la 11 sngi, ha Madanbol jong ka Ladrymbai Dongwah, East Jaiñtia Hills District.
U ma Kyrmen Shylla haba kren ha kane ka sngi, u ong kane ka jingdawa jong ka Jaiñtia Coal Ownner Miners Supplier & Workers Association (JCOMSWA) bad ka jingshah thngan u President jong ka u Marshall SB Biam ka long kaba shongnia na ka bynta ka jingmyntoi jong ki nongshong shnong ka thaiñ ban ïoh tih biang ïa u dewïong, kumba ju long ha ki 12 snem mynshwa.
Na ka liang jong u ma Kyrmen ula ai ka jingïaroh ïa u Marshall Biam uba la kloi ban aiti ïalade na ka bynta ka jingmyntoi ki paidbah. U ong ba un sa wan rah ïa kane ka jingdawa jong ka Association lyngba ki Memorandum kiba la aiti, sha u Myntri Rangbah ka jylla u Conrad K Sangma, hadien ka jingwanphai jong u na nongbah Delhi ha ka 15 tarik mynta u bnai.
U ma Kyrmen u ong ba lada ka sorkar kam sngap ïa kane ka jingdawa ban ailad ban tih dewïong, ym dei tang u President ka JCOMSWA un shah thngan, hynrei ma ki ruh kum ki nongmihkhmat ryngkat u paidbah kin sa pynlong ïa ki jingïakhih, ban pynshah skhor ïa ka sorkar, tad haduh ba kan da pyllait ïa ka jingtih dewïong.
Ka kong Santa Mary Shylla, ha ba kren ka ong ba kane ka jingïakhih jong ka Association bad ka jingshah thngan jong u President jong ka, ka long kaba shongnia. Kala pynpaw ba na ka liang jong ka sorkar ruh kala shimkhia ïa kane bad kala buh por haduh ka 7 tarik u July ban leh ei ei. Hynrei lada ka sorkar kam pyllait ban tih dewïong hadien katei ka 7 tarik u July ma ki kum ki nongmihkhmat ruh kin ïashim bynta lang ban shah thngan.