Yn pynïasoh ïa ka Sohra bad Mawsynram da ka surok bad jingkieng na wah Umïam

Shillong, Jylliew 7 : Shen ka Sohra bad Mawsynram kin sa ïasoh noh lyngba ka surok bad ka Jingkieng ba itynnad nalor ka wah Umiam bad kane ka projek kan long kum ka projek ban nang kyntiew shuh shuh ïa ka kam jngohkai ha ka jylla namar kan pynsuk bad pynjan ïa ki nongwan jngohkai ban leit jngohkai sha baroh ar ki jaka ba pawnam ha ki kam jnoghkai ïathuh u MLA ka Mawsynram u bah Olan Sing Suin.
Ka jingshna ïa kane ka surok ka dang ïaid shakhmat lyngba ka jingbei tyngka jongka World Bank. “ Ka surok na Phlangwanbroi sha Ranikor ka la ïaid shakhmat ka jingtrei. Kaba na Weiloi sha Phlangwanbroi ka jingkhot tender ka la ïaid bad yn pyndep lut nadong shadong hapoh une u bnai. Ym don jingartatien ba ïa kane ka surok yn lah ban pyndep hapoh shisnem ne arsnem bad lyngba kane ka surok kin bun shuh shuh ki nongwan jngohkai sha ka thaiñ Mawsynram bad Sohra” ong u bah Suin.
U bah Suin u la ïathuh dang shen u la ïakynduh ia u Symbud Myntri Rangbah bah Prestone Tynsong bad u la ïakren bad u ban shna noh da ka surok na Mawsynram sha Sohra lyngba ka surok Dewsaw sha Nongwar khnang ban kham jan shuh shuh ka leit ka wan.
“ ïa ka Museum jong u Slap ha Mawsynram la tei mynta bad na kata ka daw nga kwah ban pynïasoh ïa ka Mawsynram bad Sohra. Ngim dei ban shaniah ha kine ki surok ba jlan ne jngai donkam ïa ka surok kaba jan ban pynïasoh beit na Mawsynram sha Sohra” u la ong.
U la ïathuh na Dewsaw sha wah Umiam ka jingtrei ka la ïaid bad na Sohra pat naduh Nongwar shaduh Phali ruh ka jingtrei ka la sdang. Baroh ar kine ki surok kin poi beit ha wah Umiam, kumta wei ba la tei ïa ka jingkieng tang katta la ïasoh ka Mawsynram bad Sohra lyngba ka Dewsaw bad Nongwar.
“ Nga kyrmen skhem ba kane kan jia long shisha bad lada kane ka urlong ka Sohra bad Mawsynram kan khring ïa ki nongwan jngohkai na kylleng naka jindon ki krem, ki jingkieng jri, ka Museum Slap bad ter ter” ong u bah Suin.