Shillong, Jylliew 07: Ka jingai snam ei manla ka sngi ka long kaba donkam bha manla ka sngi ha ka jylla namar tang 20% ki briew ki wan ai snam da ka mon sngewbha ha ka shi snem bad ka dang long kaba duna bha, ong ka Kong Lugracia M Shullai Program Officer Meghalaya State Blood Transfusion Council haba ïakren bad katto katne ki lad pathai khubor.
Ka la ong ruh ban pynkiew ïa kane ka donkam ïa ki briew ban wan shakhmat ai snam ei da ka mon sngewbha lade khlem da pynbor.
Ka la ïathuh ba ki nongshong shnong ki lah ban leit mih ha kawei na ki 11 tylli ki blood donation centre kiba la ïoh laisen naba ka jingai snam ka long kaba kongsan namar manla ka Sngi manla ka 3 second ki briew ki duhnoh ïa ka jingim ba ki donkam snam.
Ka la ong ruh ba ka jingdonkam snam ha ka jylla mynta ka long kaba ïai dawa bha na ki nongpang naba bun na ki nongpang ki donkam ïa ka snam bad kane ka long kaba mad jingeh bha da ki briew ha kane ka jylla.
Haba kylli halor ka jingsngewtieng jong ki briew ban ai snam, ka Programme Officer ka la ong ba ha ka jingshem jong ka, bun na ki Khasi ki tieng ban ai snam naba ki tang shu ïohi ïa u thirnia ki la tieng nangta don ruh kiba pyrkhat ba lada ai snam shisien hap beit ban ai manla ka por.
“Sha ki thaiñ nongkyndong bun na ki nongshong shnong ki tieng naba ki pyrkhat ba tang shu la ai snam kin sa tlot ka met ka phad bad kan ktah ïa ka koit ka khiah jong ki bad kaba lah ruh ban ktah ïa ka kam rep kam riang kaba ki trei ki ktah manla ka sngi, kumta ka la ong ba kum kine kim dei satia ki jingshisha naba lada phi ai snam shisien ym da donkam than ban hap ban ai biang manla ka por bad kan ym ktah hi ruh ïa ka koit ka khiah jong ki,” ka la bynrap.
Shuh shuh ka Programme Officer ka la ïathuh ruh ba kumba long mynta ki briew ne ki kynhun kiba ju smat bha ban ai snam ki dei ki pulit, ki shipai, nangta ki samla pule na ki jaka pule bad kiwei kiwei pat ki kynhun.
“Kino kino ki briew kiba don ha ka met kaba koit kaba khiah ki lah ban wan shakhmat ban ai snam ei da la ka mon sngewbha lade khlem da la don mano mano kiba pynbor namar ka jingai snam ka long kumba phi ïada ïa ki mynsiem briew na ka jingkhlad noh khamtam lada kim lah ban ïoh ïa ka snam ha ka por ba ki donkam,” ka la ong da kaba bynrap ba tang ka 20% ka snam kaba la pynlang ha ki jaka sumar ha ka shisnem kam pat lah ban pyndap pynbiang ïa baroh ki briew kiba donkam snam manla ka sngi ha ka jylla.
