Ha kaba khatduh jop suk ki Karbi ha Lapangngap, hato la pyndem tdong ka sorkar jylla ha ka KAAC, ym khlaiñ bor satia ki district council ha jylla

Kan long ha kaba nyngkong eh ban sngewkmen, ïa ka jingïakren ïasuk hapdeng U Ma Sniawbhalang Dhar, Symbud Myntri Rangbah ka jylla bad U Chief Executive Member jong ka Karbi Anglong Autonomous Council (KAAC). Hynrei ha kajuh ka por, ka wan ka mat puson ïa ka kyrdan, ka jinglong heh long haiñ lane ka protocol kaba ki ju ong, la ka ïahap ne em, ïa u nongïalam jong ka sorkar jylla, ba un leit ïakren bad u nongïalam jong ka Autonomous Council bad lada ka long kumta, kan poi ka khep, ha kaba U CEM jong ka Khasi ne Jaiñtia Hills District Council, kin ïakren hi halor ki ishu bad ki kam jong u pud u sam bad ki nongïalam ka sorkar Assam.
Kumba la ïohi bad ai burom da baroh bad dei hadien ba la leit ban ïakren da u Symbud Myntri Rangbah ka jylla u Ma Sniawbhalang Dhar bad ka KAAC ba ki jaitbynriew Karbi ki ïoh ban rep ha la ki jong ki jaka kaba ym dei satia ka jaka jong ki, kumba la kam ba ka Lapangngap kadei kaba dang hab ha Meghalaya, katba ki paid bynriew Pnar ha Lapangngap ki la hap pdiang sngewbha ïa ka jingïakren kitei ki ar liang mamla, watla ki jaka rep kidei ki jong ki, hynrei ki hap mynjur bad shah lang ïa ki karbi ban ïoh rep lang.
Kane ka jingpyndem jong ka Sorkar jylla hapoh ka KAAC ka la dei lypa kaba kabu ksiar bad ka jingjop kaba khraw ïa ki jaitbynriew Karbi, ba lada la ïakren pynbeit pud ki la suk lypa ban kam trai ïa ki jaka ba ki rep hapoh Lapangngap.
Kan long ruh kaba sngew maleng shi rukom, haba ki dkhot jong ki District Council na Meghalaya, kim bit, wat tang ban don ha ki komiti pynbeit pud lane ki regional committee jong ka sorkar jylla, hynrei halor ka ishu bad ka kam jong ka Lapangap pat, ba da u Symbud Myntri Rangbah, u leit ïakren ïa U CEM ka KAAC bad katei ka pyni shai, ba ka bor jong ki District Council ha Karbi Anglong, ka kham khlaiñ shibun ban ïa ki District Council ha Meghalaya.
Sa kawei pat ka mat bad kata ka long ba ki heh jong ka sorkar jylla, ki ju kren na ka por sha ka por, ba ka Lapangap, ka dei ka jaka jong ka Meghalaya bad haba ka long kumta, kaei ka jingmut ban leit ïakren bad ki nongkam beaiñ ïa kitei ki jaka rep jong ka shnong Lapangap. Ka la dei ka kamram jong ka sorkar jylla, ba kan ïada ïa la ki jong ki jaka bad ïa ki trai jaka, hynrei lada ka jingmih ka long ha kane ka dur, ha kaba yn hap ban ai jaka rep ïa ki khar Karbi, kumta ka jingeh, kan sa nang mih nangne shakhmat, namar ba kin ïoh woh daw, ba la dep ïa mynjur da ki arliang mamla, ba kin rep ha kitei ki marjan jong ki jaka rep kba ki trai shnong Lapangap.
Ngin ïa peit ïa kaei ka ban dang jia, ha ki sngi ban sa wan, hynrei ka jingshisha, ka long ba ki jaka kiba ki Khasi Pnar, ki la long trai, kin dei ban long kumta hi bad lada don mano mano ba pynthut ne pynwit, ka jingïada ka dei ban wan na ki shipai ki swar jong ka sorkar jylla; hynrei lada katei kam mih bad ka wan pynban, da ka jingïakren shi ïakren, kumta kane ka mat, kan nym kut ha kane ka dur, hynrei kan shu long pynban, tang ki mawjynthut na ka snem sha ka snem ïa ki trai shnong jong katei ka thaiñ bad wat ha kiwei de ki jaka.
Kumba la kren shakhmat, kawei kaba i diaw mynsiem, ka dei namar ba ki District Council ha Meghalaya, ki tlot bor shi katdei eh, ym kum kiwei pat ki Council, kiba don ha Assam bad kiwei ki jylla.
Kaei tharai kaba la pyntlot bor palat ïa ki Autonomous District Council ha jylla Meghalaya ba kin long kiba tlot bor shaba palat hato dei namarba la mushlia palat ka Sorkar jylla kaba ym ailad satia ïa ki district council ba kin ïoh treikam laitluid, bad ka nuksa kaba shai bha kadei na jingïai bat jubor bad pynslem jong ka Sorkar Jylla ban pyllait ïa ki pisa ba la bei da ka Sorkar Pdeng sha ki district council, kaba la pyntlot bor shi katdei eh ïa ki Autonomous District Council kiba don ha Meghalaya.
Haba phai pat mynta sa sha ki nongshong shnong jong ka Lapangngap haduh katno ngi lah ban ong ba ki la sngewshngaiñ ha la ka jong ka jaka puta, watla mynta ki la ïoh ban leit rep leit thung, hato kin dang mad biang ïa kane ka jingsngew shngaiñ ynda la poi ka aïom ot ne ki hap ban ap biang ïa ka jingïoh jingbit napoh ka KAAC bad na ka jingleit khroh biang jong ka sorkar jylla na ki Karbi ba kin ai jingbit biang ïa ki nong Lapangngap ba kin ïoh ban kheit ïa u soh ba ki la thung naduh kine ki por ba mynta khnang ba kin lah ban pyndap pynbiang ïa la ki jong ki ïing ki sem.