Man ki jaka ïalap elekshon dap beit u paidbah, la ïapher baklybak bad ha u 2024 : Bah Hamlet Dohling

Shillong, Jylliew 05 : U Working President ka National People’s Party (NPP) Bah Hamlet Dohling u la ong ba kane ka elekshon MP shiteng samoi ka la pynkyndit lut ïa ki nongïalam ka party namar ka jingpoi u paidbah ka la ïapher bak-lybak sha ki jingïalang lada nujor bad ka elekshon kaba long ha u snem 2024.
Ha ka jingïakren bad ki lad pathai khubor, u Bah Hamlet u ong ba ha kaba sdang lada don kiba pyrshang ban ïalam bakla bun ki padbah ki ngeit bad kane ka ktah bha ïa ka party hynrei mynta pat katba nang ïaid ka por ki paidbah ki la sdang ban peitphang bad sngewthuh lut.
“Man ki jaka ïalap elekshon phin ïohi ba ki paidbah ki dap beit bad kane ka la ïapher bakla lybak lada phi nujor bad ka elekshon MP ha u snem 2024. Kane baroh kadei ba ki paidbah ki la ïoh ban bishar bad ki la sngewthuh ïa ka jingshisha,” u la ong.
“ Ha ka politik hi ka ju long kumta haba don kiba pyrshang ban pynsngewthuh bakla ha ka jinglong briew hi don kiba ngeit. Hynrei mynta ka long kaba sngewtynnad ban ïohi ba ki paidbah ki la sngewthuh ki la lah ban pynshong nongrim kaei kaba ka sorkar ka leh bad kaei kaba ki nongïalam ki leh bad kaei kaba ki trei. Ki briew mynta ki la tip kaei ka ba dei bad kano ka bym dei. Ta ka daw phin ïohi ba ka don bha ka jingkylla ha ki briew mynta ym dei tang ha sor hynrei wat ha nongkyndong ruh ba bun ki la sngewthuh.”
Shuh shuh u ong ruh ba ki paidbah ynda ki la ïohi ïa ki nongïalam ba ki trei na ka bynta ka bit ka biang u paidbah katei hi ka pynlong ïa ki ban sdang sngewthuh ïa ka jingshisha baroh.
“Na ka liang ka sorkar hi ngi buh ka thong ban ai kaba bha tam na ka bynta u paidbah bad kumta ka shong pat ha ki ban ai ka jingbishar,” u la ong.
Haba jubab halor ka jingkylli la kan don neem ka jingktah ïa ka NPP hadien ba ka UDP kaba don lang ha ka sorkar ka la sei kyrtong na bynta kane ka elekshon shiteng samoi, ka jubab kaba une u nongïalam ka NPP u ai ka long ba kan ym don satia kano kano ka jingktah.
“Nga tharai kata kan bha, namar watla ki don lang ha ka sorkar hynrei kam mut pat ba ka NPP kan khang ïa ki ban pynieng kyrtong. Ki long laitluid ban leh ïa kano kano ka kam lane ban rah ïa kino kino ki ishu, kata ka shong ha ki. Tangba kane kan ym don kano kano ka jingktah ïa ka sorkar,” u la bynrap biang.
Haba phai biang pat shaphang ka elekshon MP shiteng samoi, u Bah Hamlet u la ong ba ka lyer elekshon kam ju neh kumjuh hynrei ka kylla na kawei ka elekshon sha kawei pat ka elekshon. “Ha kane ka elekshon baroh ki party ki sei la ki jong ki kyrtong hynrei kaba sngewtynnad pat ka longba u paidbah u la stad ban bishar. Ki la ïohi ka Congress ka long kumno, ka VPP ka long kumno, ka NPP ka long kumno bad UDP ka long kumno. Kin peit ïa ka rynieng ka ryniot, ka jingnang jingtip, ka burom ka akor bad ka jingtip briew tip blei.”
Shuh shuh u la ong ba ki paidbah ki kham shemphang bun shah ban bishar namar ki tip ban mihkhmat kat ha Parliament kam dei ka kam kaba suk kumta u ong ba u don ka jingsngew skhem bad sngewkmen ban ïohi ba ki paidbah katba nang ïaid ka por ki la nang kham shemphang.