Wat pynjlan shuh ïa ka samoi treikam u Prof Shukla thung kloi noh da u VC ba thymmai dawa ka NEHUNSA

Shillong, Jylliew 1: Ka North-Eastern Hill University Non-Teaching Staff Association (NEHUNSA) ka la dawa na ka sorkar pdeng ( Ministry of Education ) ba kan pynsted noh mardor ha ka ban thung ïa u Vice Chancellor ba thymmai, da kaba ong ba ka jingpynbna paidbah ne ‘Advertisement’ na ka bynta katei ka kyrdan ka dei kaba ki la ïai ap bad ka la dei ruh ban mih naduh mynno haba ka la don ka kynrum kynram hapoh jong ka skulbah.
Ha ka shithi kaba la phah sha u Secretary, MoE hynne ka Sngi Nyngkong, ka NEHUNSA ka la ong “Ka ïaroh bad pdiang ïa jingpynmih ïa ka jingpynbna kaba ki la ïai ap bha na ka bynta ka kyrdan Vice Chancellor ka NEHU,” bad ka pynpaw ba “Ka jingkhmih lynti ïa katei ka Advertisement ka dei kaba ki la lah dep don lypa lah slem bha namar ka jingbym lah ban treikam u Prof PS Shukla.”
Ka Association ka la kynnoh ïa u Prof Shukla ba ula “Jied sngewbha dalade ban ieh ïa ka Headquarter jong ka skulbah ha Shillong,” katba ula “Pyrshang ban leh katba lah ban tuklar na sha jngai ïa ki kam pule puthi bad ïa ka rukom pynïaid ïa ki kam ki jam jong ka skulbah”.
“Kum ka kynhun kaba la rangbah ha ka pyrkhat pyrdaiñ, ka NEHUNSA ka la pynpaw ïa ka jingdon ïa ka jingngeit kaba skhem ha ka Ministry of Education, ba naduh kane ka por shakhmat, yn sa thung ïa u Vice Chancellor u ban long uba la bit lah biang ha ka kyrdan baroh ha kaba ïadei bad ka pule puthi bad ka jinglah ban pynïaid ïa ki kam jong ka skulbah bad ba kan long ruh ha ka lynti kaba khuid ba suba” la ong ha ka shithi.
Ka NEHUNSA ka la banjur ïa ka jingdonkam ban pyndep ha ka por kaba la buh. “Ka Association ka khmih lynti ban pyndep ïa kane ka jingthungkam mardor kata hashwa jong u Nailar 2026 ban kiar ïa kano kano ka jingthylli ka kam jong u nongïalam” kala ong.
“Kan long kaba sngewtynnad ba lada burom ïa ki aiñ bad ïa ki kyndon aiñ jong ka skulbah ba ha ka jingkut ka samoi treikam jong u Prof PS Shukla kum u Vice Chancellor, kumta u Professor uba la rangbah tam ha ka kam u dei ban shimti kum u Acting Vice Chancellor ka NEHU,” la ong ha ka shithi.
Ka la maham pyrshah ïa kano kano ka jingthmu ban pynjlan ïa ka samoi treikam ka jongu. “Kano kano ka jingpyrshang ban pynjlan ïa ka samoi treikam ka jongu Prof PS Shukla kan pyni ba kan long kaei kaei ka ban ktah jur ïa ka jinglong jingman baroh kawei jong ka Skulbah NEHU” la ong ka NEHUNSA.