Mardor lum nongmuna ka tnad Food Safety ïa ki jhur ha ïewduh

Shillong, Jylliew 1: Hadien ba la mih khubor ba ki jhur ba la khleh da ki dawai na ka iew die jhur kaba don ha Barpeta Road la pynkit sha Shillong ha Meghalaya, ka tnad Food Safety ha kane ka sngi Nyngkong ka la leit sha Iewduh ban lum nongmuna.
“Ngin ap ïa ka kaiphod jong ka nongmuna ba la lum mynta ka sngi,” la ong ka kong Bahun Shisha Mukhim.
Ka kong Mukhim ka la pyntip ba na ka por sha ka por ka tnad ka ju sei ïa ki nongmunajong ki tiar na ki iew ki hat ban test bad ym tang tad ynda ka la ioh kaiphod.
“Ka long kaba ju leh man ka por ba ki ophisar jong ngi kim donkam ban shah bthah,” ka la bynrap.
Katkum ka jingong jong ka, lait na kane ka jingleh ba man ka por da ka tnad, ka don ka jingshim nuksa ha ri India baroh kawei ha kaba ha ka sorkar pdeng ka rai ïa ki jait mar kiba donkam ban shim ha kawei ka bnai khnang ba ka FSSAI kan lah ban ïa nujor ïa ki nuksa.
Ka kong Mukhim ka la ong ba mynshwa ki nuksa ba la shim da ka tnad ki pyni ba kam don kano kano ka jingjaboh jong ki jhur.
“Ngi la pynlong ïa ki spot test hynrei ngim shym la lap satia ïa ka jingjaboh,” ka la bynrap.
Ka la ai jingmut ruh ïa ki paidbah lada don kano kano ka jingartatien ïa ki katto katne ki mar kim dei ban thied.
Katkum ki khubor na Guwahati ka iew die jhur kaba don ha surok Barpeta, ha kaba la iathuh ba ki don ki nongkhaïi kiba pyndonkam da ki dawai ban pynlong ïa ki jhur kiba la pyut bad kiba la sniew ban paw thymmai shwa ban die sha ki nongthied.
Katkum ka jingong ki nongshong shnong bad ki nongtrei, la kynnoh ba la pyndonkam ïa ki mar ba la pyut da ki dawai kiba jyrngam khnang ban pynitynnad ïa ka dur jong ki bad ban pynlong ïa ki ban long kiba thymmai ban die.
Ki dur ba la shim na iew la kynnoh ba ki pyni ïa ki jhur ba la ai rong jyrngam, kaba la pynmih ïa ka jingsngewkhia halor ka jingshngain jong ki marbam bad ka koit ka khiah jong ki paidbah.Ki nongshong shnong ki la kam ba katei ka rukom ka buh jingma kaba khraw ïa ki nongthied bym tip ei ei.