Nongstoiñ, Jymmang 31: Ka Dorbar shnong Nonglait kaba hap hapoh ka Hima Mawïang Syiemship Eastern West Khasi Hills District ha ka 30 tarik u bnai jymmang 2026 sngi saitjaiñ, ka la ïoh ban plie paidbah noh ïa ka jingkieng ïaid kjat bad ïa ka Viewpoint kaba la tip ruh kum ka Remkhla Valley Wahrilang Viewpoint.
La plie paidbah ïa kane ka jaka lyngba ka video call da u Commisioner secretary ka tnad tourism ka sorkar jylla u Dr D.Vijay Kumar. Katba ha katei ka jaka la sakhi ïa ka jingïadonlang ka Deputy Commissioner ka kong Anita Kharpor, nangta u Executive Director Technical MBDA u bah G.Kharmawphlang, u ADC bah M.Diengdoh, u BDO ka Mawthadraishan bah W.L Massar, ka Tourism Officer ka kong S.T Shylla, kiwei ki Ophisar Sorkar ha ka jingdonlang ki nongkitkam ki nongïalam shnong ki VO, ki khynnah skul bad ki nongshong shnong.
Ïa kane ka jingkieng la tei lyngba ka skhim MBDA bad ka MGNREGA kaba ka sanction ka long T. 64,59,270 bad la plie ïa u Mawnongrim da ka DC ka kong Anita Kharpor kum ka Kongsan. Ha kane ka jingïalang bad la khap ruh ïa u ribon kum ka jingplie paidbah ïa kane ka jingkieng bad ïa ka Tourist spot da u bah G.Kharmawphlang.
Ka jingplie paidbah noh ïa ka Remkhla Valley Wahrilang Viewpoint ha ka shnong Nonglait, kan long kawei na ki shnong ka ban khring ïa ki nongwan jngohkai pyrthei kiba ym tang na ka Jylla, hynrei nabar ka Jylla bad kiba na bar ka ri ruh kumjuh.
Kane ka jaka ka long kaba itynnad bha na ka jingdon jong ka ïa ka wah kaba kaba la tip kum ka Wahrilang bad ki lum kiba itynnad bha kiba ïohi kyndiang ïa ki lyngkha bad ki pyntha kba. Kane ka jaka ka don sha them jong kawei na ki jaka jngohkai pyrthei kaba paw kaba ju tip kum ka dom Markham ne ka Dom murok viewpoint.
Na ka liang u Commissioner & Secretary Vijay Kumar ha ka video ba u la phah, u la ai khublei kyrpang ïa ka Dorbar shnong Nonglait kaba la lah ban plie paidbah noh ïa ki lai tylli ki jingkieng ïaid kjat bad ka Wahrilang Viewpoint. U la ong ruh ba na ka liang ka Tourism kan ïai kyrshan ha kaba ïadei bad kane ka sienjam kaba ka shnong ka la shim bad ba un sa wan ban jngoh ruh ïa kane ka jaka.
Katba na ka liang ka DC ka la pynpaw ïa ka jingai khublei ïa ki nongkitkam Shnong Nonglait, ba ki la shim ïa ka jingkitkhlieh halor ka jingdonkam ki nongshong shnong ha kaba ïadei bad kane ka jingkieng ba ki la sngewthuh ban maramot bad ban shna thymmai hadien ka jingdkut ka jingkieng kaba rim.
Ka la ong ruh kane ka jingplie ka kane ka tourist spot ka long kum ka sienjam ban kyntiew ïa ka ïoh ka kot jong ki nongshong shnong bad ki rukom kamai lyngba ka jingwan ki nongwan jngohkai pyrthei sha kane ka jaka.
