Hadien ka jingap khmih lynti da ki snem, ïoh ka thaiñ Shilliang Um ïa ka kolej Mawsaw SWKHs. District

Mawkyrwat, Jymmang 31: Ka long ka jingkyrkhu kaba khraw na ka bynta ki samla shynrang bad kynthei jong ka thaiñ Shilliang Um ha kaba mynta ka sngi ka 30 tarik u Jymmang, 2026 kaba dei ka sngi saitjaiñ ka la ïoh ban sakhi paidbah ïa ka jingplie ïa ka shlem ai jinghikai kaba ki ai kyrteng ka “Rilang College, Mawsaw” ha kaba la wan ban plie da u Sniawbhalang Dhar uba dei u Symbud Myntri Rangbah ka Jylla Meghalaya kum u kongsan.
Lah ban kdew ba ka jingplie ïa kane ka kolej ka long shibynta ban pynjan ïa ka lad ba ïa dei bad ka jingkyntiew ïa ka pule puthi jong ki samla ha ki kyrdan kiba kham hajrong ha ka thaiñ Shilliang Um ha kaba haduh mynta kum ka South West Khasi Hills District ka dang don tang kawei ka kolej kata ka Sngap Syiem College, Mawkyrwat.
Ïa kane ka Rilang College, Mawsaw la tei ha kawei ka jaka ba la ai sngewbha da ka Kur Iawphniaw Mawsaw kaba dei 5 akar bad ka jingmang pisa kaba long 40 lak tyngka ei ei ba la bei pisa na ka Chief Minister Special Development Fund (CMSDF) 2018 – 2029, nangta na ka MPLADS bad na ka Special Rural Works Programme (SRWP).
U Sniawbhalang Dhar uba dei u Symbud Myntri Rangbah ka Jylla Meghalaya haba kren kum u kongsan u la kular ban ai ka kti ka mon ka kti ka diang ban pyntyllun ïa kane ka Rilang College, Mawsaw da kaba ai T. 5 lak tyngka ban ïarap ha ki jingdonkam bad kular ruh ban noh synñiang ban shna ïa ka jingker ne fencing.
Ha kajuh ka por ula ai ruh ka jingïaroh ïa u bah Renikton Lyngdoh Tongkhar ba dei lyngba ka jingaiti lut jong u ha ki kam ban wanrah ka roi ka par hapoh ka Mawkyrwat Constituency bad ka thaiñ Shilliang Um ha kaba u la ïoh ban pyntyllun ha ki kam jong ka jingshakri lyngba ki skul pule. Kumta u la ong ba ka long kaba dei ba kum ki paidbah ki dei ban ai ka jingkyrshan jong ka kti ka mon ka kti ka diang khnang ba un lah ban wanrah shuh shuh ki kam pynroi nangne shakhmat.
U Sniawbhalang Dhar haba kren halor ka jingdon jong kane ka jaka pule, ula ai mynsiem ïa ki samla pule ba haba ki la ïoh ïa ka jingtei ba paka ki dei ban long tista, minot bad trei shitom khnang ba kin nang lah ban kyntiew ïa la ka jong ka jingim ha ka jingnang jingstad bad khamtam eh ïa la ka jong ka dong ka thaiñ na ka bynta ka la shai la shisngi.
U bah Renikton Lyngdoh Tongkhar, MLA ka Mawkyrwat Constituency ha ka jingkren jong u u la pynkynmaw ba kum u nongmihkhmat ryngkat ki riew rangbah kiba ju long ki nongkyrshan ha ki por baroh ki la don shibun ki jingïaid lynti ban pyntyllun ïa ki kam pynroi hapoh ka dong ka thaiñ bad ka Constituency baroh kawei. Ym tang kata u la ïathuh ruh ba ha kaba ïa dei bad ka pue puthi ruh u la ïaid bud dien na kawei ka por sha kawei pat kumba ki la paw kum ka JNV, South West Khasi Hills District, ka EMRS School ha Rangmaw-Domjyrti kaba dang don ha ka jingpyntrei bad kiwei kiwei.
Ïa kane ka program la pynshit pynshngaiñ da ka jingrwai pdiang na ki samla pule ka Rilang College, Mawsaw bad ki khynnah skul ka Mawsaw RMSA, Secondary School.
Ha kane ka sngi plie la donlang naduh ka kong A.L. Mawlong, IAS, Deputy Commissioner, South West Khasi Hills District, u bah B. Jyrwa, MPS, Superintendent jong ki Pulit ka South West Khasi Hills District, ka N.D. Shira, MCS, Assistant Commissioner ka South West Khasi Hills District, u bah Renikton Lyngdoh Tongkhar, bad kum u President ka Governing Body, u Dr. K.D. Ramsiej, Principal ka Rilang College, Mawsaw, u Dr. K.K. Nongsiej, Secretary ka Governing Body lem bad kiwei de ki riew rangbah kynthup ïa ki khynnah skul bad ki nonghikai.