Shillong, Jymmang 31: Ka United Democratic Party (UDP) ka la pynpaw ïa ka jingkyrmen ba kan ïoh ïa ka jingkyrshan bad ka jingïatrei lang jong ka HSPDP ha kane ka elekshon MP shiteng samoi kaban sa long shen.
Ïa kane la pynpaw da u President jong ka UDP Bah Metbah Lyngdoh da kaba ïathuh ruh ba tad haduh mynta kim pat ïoh pdiang ïa kano kano ka khubor na ka HSPDP halor kane ka bynta.
Lah ban kdew hangne ba ka HSPDP ka don lang bad ka UDP ha ka kynhun synrop ba ju tip kum ka Regional Democratic Alliance (RDA) naduh mynshwa.
U Bah Metbah u la ong ruh ba kin burom ïa kano kano ka rai ba ka HSPDP ka shim kampher lada ki kyntait ban kyrshan ïa u kyrtong ba ka UDP ka pynieng ha kane ka elekshon shiteng samoi, u Bah VGK Kynta.
“Kumba long haduh mynta hi na ka liang ka HSPDP kam pat phah ktien ei ei ne kren ei ei halor kane ka phang la kin kyrshan ne kin ïaid la ka jong ha kane ka elekshon shiteng samoi,” u la ong.
Une u hehduh ka UDP u la ong ba lada jia ba ka HSPDP ka kyrshan lang ïa u kyrtong ba ka party ka sei kan nang pynkhlain shuh shuh ïa ka nongrim ba kum ki party riewlum ki ïakhun naduh mynshwa khamtam haba bun na ki nongrim treikam ki dei kiba ïa syriem.
Shuh shuh u la ong ba na ka liang ka party ka dang ap khmih lynti bad ki kyrmen ruh ba na ka HSPDP ruh kin pyrkhat bha halor kane ka mat khamtam lada jia ba kim sei la u jong u kyrtong. Halor kane ka bynta haba pyrshang ban ïa kren bad ki nongïalam jong ka HSPDP ban tip kaei ka sienjam ba kin shim la kin sei la u jong u kyrtong lane kin kyrshan ïa u kyrtong jong ka UDP, hynrei ym shym la ïoh lad satia ban pyntikna.
