Tuid ki paid riewngeit sha ka jingleh burom Maria ha Jowai Diocese (Da u MM Thaiang)

Jowai: Kumba ju long shisien shisnem ka jingleh burom ïa ka Maria ka kmie jong U Jisu Khrist bad ka Kmie jong ka Balang, ki paid riewngeit jong ka Shnatniam Jowai, Diocese Jowai, ha ka nohphai sngi la pynlong ïa kane ka jinglehburom da ka jingïaid proseshon kaba phuh kaba phieng mynta ka sngi 31/05/2026, kaba sdang na Madan Ladthadlaboh sha Mynshem St. Theresa Cathedral, Parish Jowai, ha kaba da ki phewspah ngut ki paidriewngeit jong ka Balang Katholik ki la ïashim bynta ha kane ka jingleh burom ïa ka Maria ka Theisotti, ka Kmie jong u Jisu bad ka kmie jong ka Balang. Ha kane ka jingïaid proseshon ha baroh shilynter lynti sawa da ki jingrwai bad ki jingduwai kyrpad ïa ka Maria ba kan nangduwai na ka bynta jong ki ba kin nangduplah shuh shuh ban shakri khambha ïa u Jisu Khrist kumba ka la leh.
Ha shwa ban pynkut ïa kane ka sngi da ka jingkyrkhu kaba kyrpang da ka Sakrament bakhuid tam ka Duwai, la ïoh ïa ka jingkren kaba sngewtynnat shaphang ka Maria da u Sohblei (Phadar) Richard Shylla, Asst. Parish Priest jong ka shnat niam Jowai.
U Phadar Richard haba kren ha kane ka sngi, u ong ba ka Maria ka dei ka, riewngeit kaba nyngkong bad kane ka ka paw ha ka sngi ka jinghiar u Mynsiem bakhuid “Ka jinghiar u Mynsiem bakhuid ha ka Maria bad ha ki Apostol” kaba long ruh ka sngi ka jingsdang ïa ka Balang, ka Balang kaba u Trai Jisu u la bynshet ha ki Apostol. Nangta u ong kumba ka Maria kam shym la iehnoh ïa ki Apostol, kumta ruh haduh kine ki sngi ka Maria kam shym la iehnoh bad ka don bad ki riewngeit jong ka bad kane ka jingbym iehnoh jong ka ïa ki ‘riewngeit la ainam ruh ïa ka ” Ka Maria ka Nongiarap jong ki Khristan”.
U Phadar Richard u ong ba ka Maria ym tang ba ka long ka Kmie jong u Trai Jisu ka long ruh ka Kmie jong ka Balang bad ka kmie jong ki paidriewngeit, kumta ïa ka Dur jong ka Maria kum ka jingkynmaw ieid bad kynmaw burom ym shym la buhdur tang ha ïingmane hynrei ha baroh ki Iingkhristan. Nangta u ong ka jinglehburom ïa ka Maria ka don bun rukom khamtam da ka jingduwai ïa u Rossary, ka jingleit thang Mombati, ka jingleit buh syntiew bad kiwei de ki rukom jinglehburom bad haba leh kumne ym dei ba mane blei ïa ka, hynrei ban burom namar ba ka dei ka Kmie jong u Trai Jisu bad ka jinglong kmie jong ka ïa U Trai Jisu naduh ka sngi ka jingpynbna jong u Angel Gabriel bad ka jinglong kmie jong ka Maria ïa ki paidriewngeit naduh ka sngi ba u Trai Jisu u ong ha u Ioannis Apostol” hakhmih I mei jong phi” bad ka jinglong kmie jong ka Maria ïa ki paidriewngeit ym ha ka jinglongdoh hynrei ha ka jinglong mynsiem.
U Phadar Richard u pynkut ïa ka jingkren jong u da kaba ong “Ka jingnguh khlieh, ka jingdem khohsiew, ka jingktah ïa u dur Mot jong ka Maria kam dei ba ngi mane blei ïa ka, hynrei ka long ba ngi burom ïa ka bad ïa kane ki paidbah ki sngewthuh haba ngi salut, ngi nguh khlieh, ngi ktah ïa ki dur Mot jong ki heh ki haiñ jong kane ka pyrthei ym dei ba ngi mane blei ïa ki, hynrei ngi burom ïa ki ban shuh shuh u Phadar Richard Shylla.
La pynkut ïa kane ka sngi da ka jingkyrkhu kaba kyrpang da ka Sakrament bakhuid tam ka Duwan na kti u Phadar Deimonmitre Lamare.