Pra ka ktem UDP ha Umroi shuwa ka elekshon MP, sah satang u Secretary, poi lut sha ka sem NPP

Nongpoh, Jymmang 31: Ka ktem jong ka party United Democratic Party (UDP) ha Umroi Constituency kala pra phum shuwa ka elekshon MP hadien ba daki spah ngut ki nongïalam ba hakhmat hapoh ka jingïalam ka Samla Naphishisha Marweiñ kaba dei ruh ka kyrtong MDC naka party UDP kaba la shah rem noh haka elekshon MDC ba dang shu dep, u Bah Vincent Nianglang President bad kiwei kiwei mynta ka sngi kila leit ban pynïasoh lut sha ka party NPP bad la pdiang burom ruh ïaki da ki nongïalam ka NPP Umroi Block haka jingïalang kaba la long ha Umroi.
Ïa kitei ki nongïalam bad nongkyrshan ba radbah ka party UDP kiba la leit ban ïasoh noh sha ka NPP la pdiang burom da ki heh nongïalam ka NPP Umroi Block naduh u Ma Ngaitlang Dhar, Chief Adviser u Bah Damanbait Lamare, President u ba dei ruh u MLA ka Umroi, u Bah RR Kharbuki Secretary, u Bah Pynhun Rynghang GS NPYF Meghalaya State Unit ba dei peit ïaka Ri-Bhoi bad kiwei kiwei.
Haba kren ha kane ka sngi naka liang ka kong Naphishisha Marweiñ kala ïathuh ba haka elekshon bala dep kala mih madan ban ïakhun ïaka elekshon, bad haduh mynta kam shym la shongthaid bad pyrkhat kumno ban ngin pynbeit shaei ban leit bad kumno ngin lah ban tei ïaka Umroi Constituency bad kum kawei ka khun samla ka don ka mynsiem ka jingsngewkhia bad ka jingkitkhlieh naka bynta ka constituency bad dei halor kata ka nongrim la shong pyrkhat bad ki nongïalam bad ki nongkyrshan bad rai ban ïasoh lang sha ka party NPP.
Kala ïathuh ruh baroh ki nongïalam bad ki nongkyrshan kila shim da kawei ka mih ban leit ïasoh bad sah satang u Secretary marwei.
Kala ong ruh hapdeng ka jingïaid lynti bun ki diengpyngkiang ba ïatyngkhuh bad kynduh hynrei haba ngi rung sha kawei ka party to ngin ïa tei bad pynjop donburom ïa u MLA ka Umroi sa shisien ha u snem 2028 bad ngi hap ban sdang naduh kane ka kynti ba mynta ban pynjop donburom ïa u Dr DRL Nonglait bad kane ka dei ruh ka Semi Final naka bynta ka Final elekshon ha u snem 2028.
“Da ka jingsnohkti lang ka jong ngi, ngi kyrmen bad kular ban ïatrei ryngkat ryngkat ban pynjop donburom ïa u MLA ha u snem 2028, bad mynta ka kynti ngin ai ka kti kamon ka diang naka bynta ka elekshon MP khnang ba ka NPP kan ioh ban synshar biang ha kane ka kynti kaba mynta” la ong ka samla Naphi ryngkat ka jingkyntu ban ïatreilang da ka jingieid ka jingtip briew tip blei, ym ban thew ïaki jingbakla jongno re jongno ne ban don ka jingpher jingmut.
Naka liang u Ma Ngaitlang Dhar kum u nongaibuit ka party NPP ha Umroi bad u Bah Damanbait Lamare kum u President haba kren ha kane ka sngi kila pynpaw ka jingsngewkmen kaba khraw ban iohi ba ki nongïalam bad ki nongkyrshan ka UDP kila pynïasoh lut sha ka NPP, namar ki iohi ba kane ka party ka dei shisha ka party kaba la trei borbah haka jylla ban wanrah shibun ki kam pynroi bad ki jingkylla kiba ki paidbah kim pat ju ioh mynno mynno khamtam ki kam pynroi kiba heh ba heh ki lynti ki syngkien wat shaduh ki shnong nongkyndong.
Kila ong ruh ba kane ka jingwan pynïasoh jong ki nongïalam bad ki nongkyrshan ka UDP sha ka NPP kan long ka jingkyrmen kaba khraw ïaka party NPP baroh kawei ha kane ka elekshon MP ban wan bad khamtam ruh naka bynta ka jingkhlaiñ jong ka NPP ha Umroi Constituency ha kaba kila kyntu bad ai mynsiem ruh ban ïatreilang nangne shakhmat ban kyntiew ïaka party NPP bad ïaka Umroi Constituency hi baroh kawei.