Kiew ka ka jingbiang bam ka kmie bad khunlung ha Meghalaya la nang duna kiba raikhoh

Shillong, Jymmang 31 : Ka jylla ka la ïoh ïa ka nam ba ka la nang lah ban pynbiang bam ïa ki kmie bad ki khunlung namar kat kum ka National Family Health Survey-6 (NFHS-6) ka la pynpaw ba kiba don jingduna, jinglyngkot, jingraikhoh ki la duna bha ha ka jylla namar na ka 46.5 % kat kum ka jinglum jingkheiñ ha ka NFHS-5 ki bym biang bam mynta ha ka NFHS-6 ka la hiar sha ka 36.8 %.
Kane ka jingbiang ka bam ka dih jong ki kmie bad ki khunlung ka pynpaw ïa ka jingïai trei shitom jong ki nongtrei ba hakhmat eh jongka sorkar ha ka koit ka khiah bad kumjuh ruh ka jingïatrei lang jong ki seng longkmie, ki dorbar shnong ban biang ka bam jong ki kmie ba pun bad ki khun lung.
NFHS-6 ka pynpaw ruh ba ka jingai buiñ ïa ki khyllung ka la kiew bha ha ka jylla. Kat kum ka sor jamin la paw ba ki kmie kiba ai buiñ khun ki long 76.4 % ki dei kiba ai buiñ ïa ki khun tang hadien shi kynta ba la kha ïa i khun bad 97.1 % ki dei kiba ai pynkdang beit da ka buiñ ïa ki khun haduh 6 bnai lynter.
Ki bor sorkar ki ai burom ïa kane ka jingkiew sha ka jingïatrei lang ki tnad sorkar bapher bapher, ki nongtrei ba hakhmat eh ka tnad ka koit ka khiah, ki seng longkmie, ki dorbar shnong baroh kine ki la ïatrei lang ban pynïoh ïaka jingkoit jingkhiah ïa ki kmie bad ki khyllung.
Kine ki nongtrei ba hakhmat eh jongka tnad ka koit ka khiah ki dei ki ASHA, ki Aganwadi Workers bad ki ANM.