Dawa ka JNC bad JSU ban ithuh ïa ka ktien Jaiñtia hapoh ka Meghalaya State Language Act

By Mawphor Editor On May 31, 2026

Shillong, Jymmang 30 : Ka Jaintia National Council (JNC) bad ka Jaintia Students Union (JSU) mynta ka Sngi Saitjain ki la rai ban bud dien lang ban ïoh jingithuh ka ktien Jaintia hapoh ka Meghalaya State Language Act (MSLA) bad ruh ban tynruh ban ithuh ïa ki alphabet A-B jongka Jaintia.
ïa kane ka rai la shim ha ka jingïalang jongka JNC bad JSU mynta ka sngi ha Cafe Central Jowai bad rai ban ïai bud dien ïa kane ka kam bad kumjuh ruh ban ithuh ïa u “A-B Jaintia Phonetic Alphabet”.
Ha kane ka jingïalang la ïadon lang ruh ki riewpaw khmat, ki riew khraw pyrkhat, ki dkhot jongka Jaintia Literary Body, ki Nonghikai, ki Nongthoh Kot, ki Professor bad kumjuh ruh na ki nongïalam ki arseng.
Haba kren sha ki lad pthai khubor u President ka JNC u samla Sambormi Lyngdoh u la ong ba ka jingïalang ka long kaba seisoh haduh katta katta khamtam eh da ka jingwan ïashim bynta ki riew heh khlieh.
U President ka JNC U laong “ Ngi la rai ban bud dien tyngeh ïa kane ka kam ban pynrung ïaka ktien Jaintia ha ka Meghalaya State Language Act bad ban pynthikna ruh ban ïoh jingithuh u A-B Jaintia Phonetic Alphabet kumba la dep ithuh bad mynjur ruh da ka Resolution da ka JHADC naduh u 2021 bad pynmih ruh ha ka Meghalaya Gazette notification bad kane hi ka pynpaw ba ka la ïoh ïa ka jingithuh”.
Hynrei u la ong ban ïoh tang jingithuh kam pat biang lada kum ki paidbah hi kim ri bad sumar ïïa ka ktien ka thylliej lajong. U la kyntu ïa baroh ki nong Jaintia ba kin sdang noh ban thoh kot, ki article ha ka ktien Jaintia na ka bynta ka bha ka miat ki pateng ban dang wan. Kane ka dei ka lad ka lynti kaba biang eh ban pynneh pynsah ïa ka ktien ka thylliej lajong.” Lada ngi kwah ban pynriewspah ïa ka ktien lajong ngi dei ban sdang ban thoh ban tar bad ngi dei ban sdang shwa na la ïing” ong u President ka JNC.
Ka jingpynim ïa ka ktien lajong ka dei ruh ka jingpynim ïa la ka jongka tynrai lane “Im i ktien Im ka jaidbru” u la ong biang.
U la ong ba ka JNC bad JSU kin ïatreilang ban lum thup ïa ki jingthoh ha ka ktien Jaintia bad u kyntu ruh ïa kito ki nogthoh lada ki shem jingeh ban pynmih kin wan shakhmat ban ïa kynduh ïa ki nongïalam ka seng.