Ka Sorkar kala theh jingïarap kumba 3000 tylli ki homestay ha kylleng ka Jylla hapoh ki 12-18 bnai

Shillong, Jymmang 30: Katba ka Meghalaya ka dang ialeh ban kyntur sha ka thong ban don 3000 tylli ki homestay bad pyrshang ban pynkhlain ïa ka kamai ka kajih lyngba ki kam jngohkai ha kylleng ka Jylla, u Myntri Rangbah Conrad K Sangma ha ka sngi Saitjain, ula leh ‘Live’ hala ka jongka Facebook page na Smit, kawei na ki shnong ka Meghalaya kaba itynnad bad kaba kongsan bha haba ïadei bad ka riti dustur bad ba ïatip ïa ka pateng ba riewspah bad ka jingdon ïa ki jaka jngohkai kiba itynnad.
Ka jingleit jngoh kala pyni lypa ïa ki buit treikam jong ka Jylla ban pyniasoh ïa ki kam jngohkai, ka sengkam sengkam, ka jingpynroi sap treikam bad ka jingiashimbynta ki shnong ki thaw, haba ai ruh ïa ka lad ban ïakren markhmat bad ki nong shongshnong lem bad ki nongkhaii ka thain.
Ha kane ka jingleit sha Smit, u Myntri Rangbah ula pynlut por ban ïakren bad ki nongshongshnong, ki nongshangkai bad ki nongsengkam trai shnong ha ka Iew shnong, kynthup ia u trai ka RC Homestay.Hadien ula leit jngoh ïa ka Homestay bad iakren bad ki trai Iing halor ka jingshem jong ki, ki jingeh bad ki jingangnud.
Hapdeng ka jingiakren halor ka kam jngohkai bad ka khaii pateng,ki nongshongshnong kila pynpaw ruh ïa ka jingsngew khia halor ka kam lum niut, street light bad ka jingbret jakhlia sharud shakiar ha ka thain.
U Myntri Rangbah ula kular ïa kito kiba iadonlang ba un sa pyntip ïa kine kiei kiei baroh sha ki tnad ba dei khmih.Kane ka jingleit ka la kylla long shibynta jong ka jingpyrshang jong ka Sorkar ban iakren markhmat bad ki nongshongshnong bad ban ioh ïa ki jingtip na ki shyntur jong ki nongshongshnong kiba ioh jingmyntoi na ki kam jngohkai bad ki prokram ba kyrshan ka Sorkar ban kyntiew ïa ka kamai ka kajih.
Haka jingiadih sha bad ki jingbam ba bang jong ka thain ha ka dukan sha harud surok, u Conrad ula pynshlur ïa ki nongshangkai ba kin leit jngoh ïa ki mariang ba itynnad, ka koshor bad mad ïa ka jingpdiang sngewbha ka Jylla.
“Ka long kaba donkam ban pyniasoh ïa ki briew ha ki shnong ki thaw.U nongmih khmat paidbah um lah ban sngewthuh hok ïa ka jingim bad ka jingeh jong ki paidbah khlem da long kiba jan bad ka imlang sahlang” ula ong.
Haba ai khublei ïa ka Sorkar namar ka jingiarap song pisa bad ka jingkyrshan bala ioh lyngba ki skhim bapher bapher, u trai ka Homestay ula batai ba kumno kine ki jingkyrshan kila pynlah ia ka iing jong u ban pynkha bad pynheh ia kane ka kam. Haba iaroh ia ka jingiaid shaphrang, u Myntri Rangbah ula iai ban ia ka jingkut jingmut jong ka Sorkar ban kyrshan ia ki nongseng kam trai jylla.
“Ki Homestay ki long kiba donkam bha bad kiba kongsan shikatdei eh na ka bynta ka kam jngohkai jong ngi.Lyngba ki Homestay, ngi pynthikna ba ki jingmyntoi ba ngi ioh na ka kam jngohkai ka leit beit beit sha ki longiing bad ki shnong ki thaw” ula ong.
Ka kam jngohkai ka iai long ka mat pdeng jong kane ka jingiakren, ha kaba u Conrad ula pyntip ba ka Meghalaya ia mynta ka don jan kumba 900 tylli ki homestay kiba la treikam, katba sa 2100 tylli la khmih lynti ban sa mynjur shen. Ka Sorkar kala trei ban thaw ia ka jingiatreilang jong kumba 3000 tylli ki homestay ha kylleng ka Jylla hapoh kine ki 12-18 bnai.
Ka jingiakren kala ktah ruh halor ka sap treikam bad ka jingpynmih kam. Ka Skill Meghalaya Programme kala ai jingmyntoi ia jan 30,000 ngut ki samla lyngba ki jingai jinghikai bapher bapher, kynthup ia kumba 2000 ngut kiba la ioh jinghikai ha ki kam jngohkai bad ki kam ban pdiang ia ki nongwan kai. Hapoh kane ka prokram, ka Sorkar ka thmu ban ai jinghikai ia 1.2 lak ki samla, kynthup 5000 bala mang kyrpang sha ka sap trei ba iadei bad ki kam jngohkai.
Ula kren ruh halor ka jingkyrshan bala ai lyngba ka PRIME bad CM Elevate Scheme, ha kaba kumba 200 tylli ki kali la dep ban bei tyngka ban pynioh ia ka lad kamai jakpoh lyngba ki kali, katba 52 ngut ki samla pule kila ioh ia ka jingkyrshan song pisa ba kin leit pule ia ka Hospitality Education ha IIHM bad kiwei ki jaka pule.