Shillong, Jymmang 29 : Ka sorkar jylla ka la shim khia bha ban thaw ki lad ki lynti ban wanrah ïa ka jingshongsuk shongsaiñ ha Lapangap namar wat u Myntri Rangbah u Conrad K Sangma ryngkat bad u Symbud Myntri Rangbah u Ma Sniawbhalang Dhar ki la dep ïakren bad u Myntri Rangbah ka Assam u Himanta Biswa Sarma, ong u Myntri ka tnad pynmih bording bad President ka UDP u bah Metbah Lyngdoh.
Ka jingïakynad kaba jur ka la jia ha ki shnong khappud ka Meghalaya bad Assam kiba hap hapoh ka Karbi Anglong bad kane ka la neh kumba katto katne por.
Na ka liang ka tnad kam pohïing ruh ka la shim khia bha ban wanrah ïa ka jingshongsuk shongsaiñ bad ban ym jia kino kino ki jingkulmar ba mynshaw.
“ La pyntip ïa nga ba mynta ka sngi u Myntri Rangbah ka jylla ula ïakren bad u Myntri Rangbah ka Assam halor kane ka kam ha Lapangap bad nga ngeit skhem ba shen ka shongsuk shongsaiñ bad jingïasngewthuh jingmut kan sa wanphai biang”.
U la ong ba kane ka jingjia ha Lapangap ka la buh ïa ki paidbah khamtam ia ki nongrep ha ka jingeh kaba khraw kumta ka sorkar ka shim khia bha khnang ban wanphai biang ka jingïasngewthuh jingmut.
U la ong ruh ba ka sorkar ka la trei bha ban ïada ïa ki paid khappud. “ Ka sorkar ka la shim bun ki lad ki lynti ban pynbeit ïa kine ki jingeh bad ban pynthikna ba ki paid khappud kin lait na kano kano ka jingshah pyndik ne jingkulmar.
U la ïathuh ba dang arsngi mynta u dang dep ïakren bad u myntri rangbah bad u la ïathuh ba u la shim khia hi na ka liang jongu halor kane ka kam.
