Nongstoiñ, Jymmang 29: Ka seng Hynñiewtrep National Youth Movement hapoh ka jingïalam u bah Tailan Lyngkhoi President ka seng HNYM West Khasi Hills District, mynta ka sngi ka la leit ban ai da ka jingthoh sha ka Hema Nayak Deputy Commissioner ka West Khasi Hills District, ban dawa na ka sorkar ïa ka ban pynbit pynbiang noh da kaba buh ryntih da ki street light, ki CCTv bad kiwei kiwei ki tiar peit pyrman ïa ka suk ka saiñ, namar ka jingsdang jyllei palat ki kam tuh kam thiem hapoh sor Nongstoiñ.
Ka seng ka la pynpaw ba ka daw kaba pynlong ïa ka seng ban leit ai jingthoh sha ka sorkar ka dei halor ka nongrim, ba la don bun ki paidbah kiba la ujor sha ka seng halor ka jingkharoi ki nongtuh nongthiem kiba la tuh naduh ki Kali, ki Masi, kiba pied bad lied ïa ki dukan bad kiwei kiwei.
Ka seng ka la ong ruh ba haba ïadei bad katei ka phang, ka seng naduh u snem 2024 ruh ka la dep ai jingthoh ha u Deputy Commissioner barim ka West Khasi Hills District. Hynrei haduh mynta ym pat ïohi dak ei ei khamtam haba ïadei bad ki CCTv namar la ong ba ka jingdon jong ki CCTv, kan pynshngaiñ shibun ïa ki paidbah haba ki ïaid haba mih kino kino ki kam kiba kyrkieh ha ka miet ka ïong.
