Shillong, Jymmang 29: Ka seng saiñ pyrthei ka Hills State People’s Democratic Party (HSPDP) ka la pyntip ba ka dang shong pyrkhat halor ka nongrim jong ka haba iadei bad ka elekshon MP Lok Sabha bad kan sa pynbna ïa ka rai ha ka taïew ban wan la kan leh kumno ïa kane ka kam.
Haba kren sha ki lad pathai khubor u General Secretary ka HSPDP u Bah P Ryntathiang u la ong ba ka Party ka la ïakren bunsien bad ka United Democratic Party (UDP) halor kane ka kam hynrei kam pat lah satia ban shim ïa ka rai.
U la ong, “Ngi la ïakynduh bunsien bad ka UDP, hynrei ngim pat lah ban shim ïa ka rai ba khatduh, ngi dei shibynta jong ka RDA, khlem artatien, hynrei ïa mynta ngi sngew ba kan bha ba ngin bishar bniah shwa ha kaba ïadei bad ka elekshon MP,”
Shuh shuh u Bah Ryntathiang u la kyntait ruh ban pynthikna, la ka HSPDP kan kyrshan ne em ïa u kyrtong monlang jong ka RDA ha kane ka kynti.
U la bynrap, “Kumba ka long mynta ngam pat lah ban ïathuh, ka jingïakren ka dang ïaid hapoh ka party, nga tharai haduh ka taïew ban wan ngin sa pynshai bniah halor kane ka kam”.
Shuh shuh u la bynrap, “Kumba ka long mynta ngam pat lah ban ong la ngin kyrshan ne em, ngin sa pynshai ha ka taïew ban wan halor kane ka jingai jingkyrshan.”
Lah ban pynkynmaw ba ka UDP ka la pynbna ïa ka kyrteng jong u nongïasaid aiñ ba Rangbah u Bah Vivanstone G Kharngapkynta kum u kyrtong jong ka ha kane ka ilekshon MP Shillong Lok Sabha ka ban sa long shen ha ka jylla.
