4 tarik Jylliew yn shongbishar ka ïingbishar HC halor ka jingpanbor u bah Batskhem ban ïakhun elekshon

Shillong, Jymmang 23 : Ka ïing Bishar High Court jongka jylla ka la buh ban shong bishar ha ka 4 tarik Jylliew halor ka mukot duma ba la ujor da u kyrtong ka VPP uba dei ruh u Professor ka NEHU uba la dawa ban pynskhem ïa u kum u Professor bad kumjuh ruh ban ai ïa ka No Objection Certificate (NOC) ba un ïaleh ïa ka election shiteng samoi jongka MP Lok Sabha. Halor kane ka ïing Bishar ka la phah jingthoh sha ka NEHU bad kumjuh ruh sha baroh kiba paw kyrteng ha ka mukotduma.
ïa kane ka mukotduma la shong bishar da u Nongbishar Justice H.S Thangkhhiew myn ha ka Sngi Palei 21 tarik.
U S.Sen uba dei u Nongïasaid aiñ ba la rim bha u la shimti ïa kitei ki jingthoh na ka bynta kiba shah ujor. U la kyrpad ban ai por ïa u shitaiew ban pan jingpynshai bad na ka liang ka ïing bishar ruh ka la pdiang bad mynjur ïa kane.
U bah Myrboh u la leit ujor sha ka ïing Bishar HC hadien ba ka NEHU ka la pynslem ban ai jubab halor kitei ki jingpan NOC jongu ban ïaleh ïa ka election shiteng samoi.
Kane ka Seat ka la thylli namar ka jingkhlad noh jong u MP uba dei na ka VPP hi u Dr Ricky AJ Syngkon.
U nongujor uba la jied da ka VPP ban long u kyrtong jongka u la kam ba u la rung kam la palat arsnem bad kam pat don kano kano ruh jingdon dak sniew jongu hapoh katei ka skulbah. Hynrei katei ka skul bah kam pat pynskhem ïa ka kam jongu kat haduh mynta lane kam pat ai ïa kata ka NOC ruh.
Ha ka mukotduma u bah Myrboh u la pynpaw ba hadien ba la jied ïa u kum u kyrtong u la ai jingthoh sha u Pro VC ka NEHU kata naduh ka 5 tarik Lber 2026 ban shah ïa u ban ïakhun ïa ka elekshon. Hadien kane u la ai sa kawei ka jingthoh sha u Vice Chancellor ha ka 10 tarik Iaiong 2026 ban pan ïa ka NOC ba un ïakhun kum u kyrtong ka VPP hynrei haduh mynta um pat ïoh kano kano ruh ka jubab.
U Pro VC ha ka 4 tarik Jymmang 2026 u la pyntip ba kat kum ki kyndon aiñ jongka NEHU ne ka NEHU Regulation Rule Re- 05 dei tang ka Executive Council kaba lah ban ai bor ïa u Nonghikai ka NEHU ban ïakhun ïa ka election MP ne MLA ruh.
Katba na ka liang u bah Myrboh u la ong ba u la palat ïa ka arsnem ba u la don ha NEHU naduh ba la thung ïa u ha ka 20 tarik Nailur 2025 bad u la dei ban shah pynskhem. Haba ka kyrteng jongu ka jah na kiba dei ban ïoh jingpynskhem ne ki Associate Teacher u la thoh sha u VC ha ka 12 tarik Jymmang 2026 ban pynbeit ïa kane ka kam.
Ha ka 15 tarik Jymmang 2026 u Joint Registrar Establishment II u la pyntip ïa u ba u Chief Vigilance Offic er u la ai ïa ka Vigilance Certificate kaba ba ym don kano kano ka jingthoh ba pan jingpynshai na u bah Myrboh namar ym lap ei ei kaba pyrshah ïa u.
U la ong ba um i don daw ei ei ruh ban pynslem ban pynskhem ïa u bad kumjuh ruh ban ai ïa ka NOC bad ong ba kane ka jingpynslem ka la pynkulmar jingmut shi katdei eh.
Kumta u la kyrpad ïa ka ïing bishar ba kan bthah ïa ka NEHU ban pynskhem ïa ka kam jongu bad kumjuh ruh ban ai ïa ka NOC.