Balei ka sorkar Jylla ka shu sngap halor ka bynta ba ar ka surok Nongstoiñ-Rambrai-Kyrshai

Nongstoiñ, Jymmang 22: Ka jingpyntrei ïa ka surok ar laiñ Phase 1 na Nongstoiñ haduh Kyrshai lyngba ka Rambrai, ka la pynsuk shibun ïa ki paitbah nongleit nongwan ha ka thaiñ Rimen. Hynrei, ka jingpyntrei ïa katei ka phase 1 kaba jrong tang kumba 34 kilomitar tam, ka kut tang haduh Mawthir bad ka phase 2 kaba dang sah kaba pynpoi haduh Kyrshai ka dang don sa kumba 34 kilomitar.
Ha kaba ïadei bad ka jingsahteng jong ka phase 2, ki paidbah nongshong shnong ka West Khasi Hills ki la pynpaw ka jingsah umdum bad kiba bun ki buh jingkylli ruh halor kane ka jingpynslem da kaba ong ba hato don aiu shalyndet. Bun ki la pynsngew ka sur jingdawa kaba jur ïa ka sorkar ba kan mang pisa bad pyntrei noh kloi katba lah ïa katei ka surok.
Haba ïakren bad u nongthoh khubor, ki katto katne ki riew rangbah ba kynthup ïa u bah B.Marbaniang bad bah J.Lyngkhoi na Rambrai, ki la ong ba naduh nyngkong ka sorkar ka la pynshai sha ki paitbah, ba ka jingpyntrei ïa katei ka surok kan long haduh Kyrshai khappud bad ka Assam.
Hynrei kaba lyngngoh ka long ba hadien ba ka sorkar ka la mang pisa bad khot tender pat, ka jingpyntrei ka long tang arphew san kilomitar, da kaba pynpaw sha ki paitbah ba ka dei ka jingpyntrei kaba nyngkong bad kular ruh ba kan sa pyndep ban pyntrei haduh Kyrshai.
Nalorkata ki la ong ruh ba lada ka sorkar ka pynslem ban mang pisa ban ban khot tender noh sa ïa ka phase 2, kam don jingmut ban pyntrei tang arphew san kilomitar namar ka jingjrong jong ka surok haduh Kyrshai ka long hynñiew phew kilomitar.
Kiba bun ki la pynpaw ba naduh ba ka sorkar ka la pynbna ba yn pyntrei noh ïa ka surok Nongstoiñ Kyrshai, ki paitbah ki la kmen bad ki la khmih lynti ba ynda la dep ban pyntrei ïa katei ka surok, ki paitbah na ki thaiñ Kyrshai ki la suk ka leit ka wan bad lada ki mut ban wan donkam sha Nongstoiñ bad Rambrai, kim donkam shuh ban leit na Chaygaon, Boko bad kiew lyngba ka surok kaba ïaid lyngba ka Langpih ne ban kiew lyngba ka surok Athabari Riangdo.
Ha kajuh ka por ki la ong ba katei ka jingkhmih lynti jong ki paitbah ka thaiñ Kyrshai ka la shu kut noh, namar haduh mynta ym pat ïoh jingtip la ka sorkar ka la mang pisa ne em na ka bynta ban ban pyntrei ïa katei ka phase 2.
Kum ban pynkynmaw ba naduh ki snem ba la dep ki nongtrei jong ka PWD ki la pyndep ïa ka jingsorbe ïa katei ka surok haduh Kyrshai, hynrei ym shym la ïoh jingtip pat ba na kaei ka daw ba ka sorkar kam shym la khot tender ban pyntrei haduh Kyrshai.
Ki riew rangbah ki la kynthoh ba hato ka sorkar ka la leh aïu na ka bynta ka phase 2. Lada lap ba ka sorkar kam pat leh ei ei, ki nongsynrshar shnong bad ki paitbah ka thaiñ Rambrai haduh Kyrshai, kin leh da kaba tyngeh bad dawa na ka sorkar ba ka dei ban pyndep noh kloi ïa katei ka surok haduh Kyrshai.
Kumjuh ruh na ka liang ki nongïalam ka FKJGP Rambrai circle, ki la pynpaw ka jinglyngngoh halor ka jingbym pat khot tender shuh ïa ka surok Nongstoiñ Rambrai Kyrshai Chaygaon phase 2, ha kaba wat ïa ka DPR ruh ym pat dep satia.
Ki nongïalam ka FKJGP Rambrai circle ki dawa na ki bor ba dei peit ban pynkloi ïa ka Phase 2, ban pyndep ïa ka sanction bad khot tender noh, namar katei ka surok ka dei kaba donkam ïa ki paitbah ka Rambrai-Kyrshai bad ïa ka West Khasi Hills baroh kawei.
Ki nongïalam ki la ong ba lada kan shu kut tang ha Mawthir kaba 34 kilometer, ki paitbah ka Rambrai bad ka West Khasi Hills kim pat ïoh jingmyntoi ei ei ruh em, namar lah long kumba phong tang ka sopti khlem ka patlun. Ka surok ka dei u budlum ïa ka ïoh ka kot jong ki paitbah ka thaiñ bad ka jaitbynriew.