Shillong, Jymmang 22: Ka Executive Committee (EC) jong ka Khasi Hills Autonomous District Council (KHADC) kaba ïalam ka Voice of the People Party (VPP) kala sospon noh ïa u Syiem ka Hima Mylliem u Paiem Ainam Manik Syiem.
Katkum ka hukum ba la soi da u Secretary jong ka Executive Committee mynta ka sngi ka 22 tarik u Jymmang, katkum ka bor hapoh ka kyndon 7 jong ka Khasi Hills Autonomous District (Appointment and Sucession of Syiem, Deputy Syiem, Electors bad Rangbah Shnong Syiemship) Act 2007.
Ha ka jaka jong u Paiem Ainam Manik Syiem la thung ïa u Alban Fedrick Syiem ban pyniaid ïa ki kam jong ka Hima.
Kane ka hukum kan trei kam mardor tad haduh ban da pynbna da kumwei pat.
