Ka jingkiew ka ïoh ka kot marwei kam pat biang, lada ki jingmyntoi kim poi sha man ki thliew ïing: Conrad

Tura, Jymmang 21: U Myntri Rangbah Conrad K Sangma mynta ka sngi, ula ïa shim bynta ha ka Skillerate 2026 bala pynlona ha Holly Hock marjan ka Bakdil Training Centre ha Tura, kaba pynskhem ïa ka jingkut jingmut jong ka Sorkar ban pynkhlain ïa ka jingpynroi ïa ki sap treikam, thaw ïa ki lad iohkam iohjam bad ka lad sengkam seng jam na ka bynta ki samla jong ka Jylla.
Ïa kane ka prokram la pynlong da ka Tnad Labour, Employment & Skill Development, ka Sorkar Meghalaya, ha ka jingiatreilang bad ka CM Skill Mission bad ka Meghalaya State Skill Development Society (MSSDS).
Ha kane ka jingialang la wan ïa shim bynta ruh da u Myntri ka Tnad Labour, Employment & Skill Development Bah Methodius Dkhar, uba la shah khot kum u kongsan symbud ha ryngkat u Deputy Commissioner ka West Garo Hills Vibhor Aggarwal, ki Heh Ophisar, ki nonghikai, ki nongioh jingmyntoi, bad ki kynhun ba don bynta ha ki kam pynroi sap treikam.
Haba ai jingkren, u Myntri Rangbah Conrad K Sangma ula ong ba kane ka prokram ka pyni ïa ka jingiohi jngai kaba ïar jong ka CM Connect ka Sorkar, ha kaba ki nongshongshnong ki lah ban pynsngew beit beit ïala ki jingeh, ki jingangnud bad ki jingai jingmut sha ka Sorkar. Ula ong ba kawei na ki jingeh ba ïai mih kiba la pynsngew bha da ki samla lyngba ka CM Connect ka dei ka jingdonkam ban don kham bun ki lad ha ka jingpynroi ïa ki sap treikam, ka jingsengkam sengkam dalade bad ka jingkyrshan ïa ka kamai ka kajih.
U Myntri Rangbah ula ong ba katba ka Meghalaya kala kynshew palat ïa ka T. 32 klur ha ki prokram pynroi sap treikam bapher bapher kiba la ai jingmyntoi ïa ki hajar ngut ki samla, ka Sorkar ka shem ba tang ka jingai jinghikai kam pat biang satia. “Kiba bun kiba dep ioh jinghikai ki pynpaw sha ngi ba wat hadien ba kila pyndep ïa ki jinghikai jongki, kim don pat ïa ki tiar ki tar kiba donkam ba kin sdang ban trei hi noh la ka jong. Ki mechanic ki lah ban pyndep pura ïa ka jinghikai hynrei khlem ki tiar ban trei, khlem da plie ïa ki karkhana shna kali ka long kaba shem jingeh bha” ula ong.
U bynrap ba ka Sorkar namar kata, kala rai ban ai ïa ki tiar treikam bad ka jingkyrshan ban sengkam ïa ki samla kiba la pyndep ïa ki jinghikai khnang ba kin lah ban pynmih kamai mar mar bad trei kam lajong.”Ka prokram kam dei eh tang halor ka jingsam ïa ki tiar treikam.Ka dei halor ka jingpynioh ïa ka burom, ka jingshaniah halade bad ka lad kamai kajih na ka bynta ki samla jong ngi” ula kynthoh.
Haba kren halor ka jingkiew ka ioh ka kot ka Jylla, u Myntri Rangbah ula ong ba ka Jylla mynta kala ioh ïa ka jingithuh kum kawei na kiba kiew sted bha ha ka ioh ka kot hapoh ka Ri. Hynrei, ula ban jur ba ka jingkiew ka dei ban ïai long kaba kynthup lang ïa baroh bad poi sha ki riew paidbah. “Ka jingkiew ka ioh ka kot marwei kam pat biang stia lada ki jingmyntoi kim poi sha man ki thliew iing, sha man ki samla, man ki nongrep, man ki nongtrei bad man ki nongsengkam” ula pynpaw.
Ula pynpaw ruh ïa ka jingshem ba kawei na ki jinghikai ba kongsan ba ka Sorkar kala ioh ka long ba ki jingai jinghikai halor ka sap khlem ka jingkyrshan kaba dei ka long ka bym pat dep pura. “Mynshuwa, bun ki prokram ki pynleit jingmut tang haki jinghikai, hynrei ngi sngewthuh ba tang haba don ka jingiakhublei kti, ki tiar treikam, ka jingpynioh ïa ki iew, bad ka jingkyrshan ïa ka ioh kam, ka jingktah kan ïai long da u pud. Ngi la ithuh ïa kane kum ka bynta kaba jah bad mynta ki prokram ki thmu ban pyndap noh ïa kine ki jingduna” ula ong.
U Myntri Rangbah ula kren ruh halor ka jingiatehlok ka Sorkar bad ki jaka ai jinghikai bashimet bad ki kynhun ba don bynta ban pynjanai ïa ki prokram pynroi sap. Kat kum ka jingong jong u, kum kine ki jingiatreilang kila kyntiew ïa ki jaka ai jinghikai, wanrah ïa ki jingai jinghikai kiba long kat kum ki jingtreikam ha ki karkhana, bad nang pynbun ïa ki lad ki lynti na ka bynta ki samla ka Jylla.
Haba ai jingkren ha ka jingialang, u Myntri ka Tnad Labour, Employment & Skill Development u Bah Methodius Dkhar ula kren halor ka jingkongsan ban pyntbit ïa ki samla da ki sap kat kum ki jingtreikam ha ki karkhana, bad pynbun ïa ka lad iohkam iohkam lyngba ki prokram ai jinghikai bad pynroi ïaka sap.
“Haba ieng hangne hangne mynta ka sngi ka ai ïa nga ka jingkmen kaba khraw, ka jingsngewtynnad, bad ka jingsarong,” u la ong haba bynrap ba ki jingsngew jong u ki mih na ar tylli ki daw – ka burom ban kren ha ka jingdonlang u Myntri Rangbah ha ka constituency jong u hi, bad ka lad ban ïakren bad ki samla kiba la don sap bad kiba smat ba sting.
Ula ong shuh shuh, “Haba nga peit sha phi baroh, Ngam shym iohi ïa phi tang kum ki nongshah hikai-nga iohi ïa ki nongsengkam ka lawei, ki nongsei ïa ki buit treikam ka lawei, ki nongialam ka lawei bad ki nongwanrah jingkylla jong ka lawei ka Meghalaya”.
Ha kane ka prokram, la sam ruh ia 34 tylli ki work order hapoh ka Skill Meghalaya bad Supporting Human Capital Development in Meghalaya (SHCDM) na ka bynta ka jingai jinghikai ïa ki 4830 ngut ki nongshah hikai, kaba ka dor baroh jong ka work order ka long T.16,59,56,334 hapoh ka Skill Meghalaya, la sam ïa 28 tylli ki work order ba kynthup ïa 3920 ngut ki nongshah hikai, ba kot T. 12,04,35,044, katba hapoh ka SHCDM la sam ïa 6 tylli ki work order ba kynthup ia 900 ngut ki nongshah hikai ba kot T. 4,55,21,290. Ka jingpynlut na ka bynta shikhlieh ki nongshah hikai ka long T. 30,645 hapoh ka Skill Meghalaay bad T. 50,579 hapoh ka SHCDM.
La sam ruh ïa ki tiar treikam ba shongdor T. 44, 72, 289 sha ki 798 ngut ki nongioh jingmyntoi kiba trei ïaki kam bapher bapher ban kyrshan ïa ka jingsengkam lajong.Ki tiar ki kynthup ïa ka plumbing, automotive service, gardening, farming, masonry, mobile phone repair bad rep tit.