Jowai, Jymmang 21: U Myntri ka koit ka khiah ka sorkar jylla u ma Wailadmiki Shylla ha kane ka 20 tarik u Jymmang, 2026 ula sam ïa ki tiar ki tar ba pyndonkam ha ki jaka sumar bapher bapher hapoh ka West Jaiñtia Hills kiba kynthup ïa ki Sub-Center, PHC, CHC bad Civil Hospital.
Ha ka juh ka por u myntri ula aiti ruh ïa kiwei de ki tiar ba pyndonkam haki Aganwadi Centre kiba la jied hapoh ka Thadlaskeiñ, Laskeiñ bad Amlarem ICDS Centre.
La pynsngew ba ïa kitei ki tiar la thied da ka jingïarap pisa na ka Power Finance Corporation Limited hapoh ka CRS haka jinglut kaba la kot T. 5.8 klur, lyngba ka jingïarap Deputy Commissioner of West Jaiñtia Hills u Abhinav Kumar Singh, IAS ha ryngkat u myntri ka koit ka khiah uba dei ruh u local MLA ka Jowai Constituency.
Ïa kane ka prokram la pynlong ha District Library Auditorium, Mynthong Deputy Commissioner, Jowai la pynïaid da ka ophis u Deputy Commissioner, West Jaiñtia Hills District, haka jingdonlang u Deputy Commissioner Abhinav Kumar Singh, ka Assistant Commissioner kong E. Ch Momin, ka DM&HO Dr. P. Shylla, ka Child Development Officer of Thadlaskeiñ ICDS Project Smt. Darinylla Iakai, ki Doktor, ki nongtrei ASHA bad ki ophisar na ka tnad ka koit ka khiah.
U ma Wailadmiki Shylla haba ai jingkren ula pynpaw ïa ka jingkmen halor ka jingjop ka sorkar ban thied bad ban sam ïa kitei ki tiar, da kaba pynpaw ba ka jingdon jong ki kan pynkhlaiñ ïa ka jingshakri haka koit ka khiah hapoh ka District. Ula ai ruh ka jingïaroh ïa u Deputy Commissioner ka District halor ka jingtrei shitom jong u ban pynbiang ïa ka pisa na ka bynta kane ka jingthmu.
Shuh shuh u myntri ula ong ban pynbha ïa ka koit ka khiah ha ki jaka sumar ka sorkar ka la mynjur ruh haduh Rs. 53 klur na ka bynta ban kyntiew kyrdan ïa ka Ummulong CHC sha ka Integrated Hospital. Yn pynbuh sa 50 tylli ki jingthiah ha kane ka Hospital khnang ban ïarap ïa ka jingkit ba khia ka Civil Hospital.
Ula pyntip ba ka sorkar ka dang thmu ruh ban pynheh shuh shuh ïa ki lai tylli ki Civil Hospital kiba don ha ka Jylla kata ka Shillong Civil Hospital, Tura Civil Hospital bad ka Jowai Civil Hospital ha kaba ka jinglut jingsep kan long haduh Rs. 500 klur tyngka.
U la pyntip ruh ba ka Jowai Civil Hospital shen kan sa ïoh noh ïaka kor mashin MRI, da kaba bynrap ruh ba ka jingkhot tender kala ïoh shakhmat.
Naka liang myntri ula khot ban don jingïatreilang hapdeng ki paidbah bad ai jingkyrshan pura ïa ka sorkar, ïa ki doktor bad ki nurse na ka bynta ka lawei ka koit ka khiah.
Haba kren shaphang ki jingpynbiang ïa ki tiar ki tar hapoh ki Aganwadi Centre, ula ong ka long kaba donkam eh ban peit koit bha ïa ka khiah jong ki khynnah naduh ka por ba ki dang rit, khnang ban ïarap ïa ki naduh ka bor pyrkhat bad ka jingheh jingsan jong ka bor met kumjuh.
