Shillong, Jymmang 19 : Ka sorkar MDA ka la kyntait ïa ka jingkynnoh ba ka tnad Public Health Engineering (PHE) ka pynkheiñ ïa ki kyndon ha kaba ïadei bad ka jingai kontrak haduh 1900 klur tyngka sha kawei ka kompani kaba na bar jylla. Na ka liang u nongpathai khubor ka sorkar bad myntri ka tnad ka koit ka khiah u ma Wailadmiki Shylla u la ong ba ka jingkhot tender ka long kaba shai bad kam don kano kano ka jingleh shilliang khmat.
Halor ka jingkynnoh ba la leh shilliang ban ai sha ka kompani, u ma Shylla ul a ong ba man la kawei pa kawei ka tender ba la khot da ka tnad ka long kaba khuid ba suba bad kaba shai ym don kano kano ka jingleh sop sop bad haba bishar ïa ki tender ruh ka long beit thik kat kum ki kyndon.
“ Na ka bynta kano kano ka jingkhot tender ne shwa ban ai ïa ka tender ki don ki kyndon kiba hap ban bud pyrkhing. Kino kino ki kompani kiba thep tender ruh ki hap ban bud pyrkhing ïa ki kyndon jongka tender bad ki dei ban long kiba biang lut ki kot ki sla, ka pisa bad kiba la trei bun ki kam.
Kumta kam don kano kano ka jingleh shilliang khmat ka tnad PHE ka la bud ïa ki kyndon nadong shadong. Kam lah ban long ban shu jied mata madei kat ïa uba ka mon. Ki don ki kyndon aiñ ba hap ban bud nalor kata haba khot kam mut ba khot tang ïa kawei ka kompani baroh ki lah ban thep tender. Nalor kata ïa ki kyndon ruh ym lah satia ban pynkylla ban myntoi tang kawei ka kompani namar baroh ki kompani ki hap ban bud lang ïa kijuh ki kyndon.
Lada don kiba ïoh ka mut ba ki la bud ïa ki kyndon kiba la buh ha ka tender.
