Shillong, Jymmang 19: ka seng Hynñiewtrep Youths’ Council (HYC) ka la kynnoh ba ka la don ka jingpulom ha kaba ïadei bad ka jingpynïaid iï ka state reservation policy ne ka bhah thungkam thungjam ïa ki nongtrei hapoh ka Women’s College, Shillong.
Ha ka shithi ba ka la phah sha ka ophis Directorate of Higher and Technical Education, katei ka seng ka la ong ba kitei ki kam ki dei kiba la bei pisa pura da ka Sorkar jylla bad kumta ka dei ban bud ïa ka bhah thungkam thungjam jong ka jylla.
Haba phai sha ka jingtohkit kaba la ïoh lyngba ka Right to Information (RTI), ka HYC ka la ong ba na ki 22 tylli ki kam hikai bad kiba trei (teaching and non-teaching posts) kiba la mang, tang 3 tylli ki la ïoh kam napoh ka kynhun jaitbynriew Khasi-Jaiñtia.
Ka seng ka la bynrap bad kynnoh ruh da kaba pynpaw ka jingsngewkhia kaba jur ba ki jaka pule kiba treikam lyngba ka jingïarap jong ka sorkar khamtam haba mang ïa ki kam kiba lait, hynrei ka la leh bym suitñiew ban pyntreikam ïa ki kyndon jong ka bhah kam bhah jam ha kine ki snem ba la leit.
Kumta halor kane ka seng ka pan ka jingpynshai la ki la bud bha ne em ïa ka reservation policy bad ïa ka roster system bad ka la pan ruh ïa ki appointment record kiba pura, nangta ki roster register bad ki jingtip ba bniah katkum ki kyrdan ïa ki kam ba la mang ba kin aiti sha ki bor ba dei khmih halor kane ka bynta.
