Ladep khlong bad pyndep ki pulit ïa ka Post Mortem jong u samla ba kynnoh shah bom ha Pynter

Shillong, Jymmang 18 : ïa ka metiap jong u samla Trophimos Khongmawdoh uba la khlad halor ka jingkynnoh ba u shah bom ha u Rangbah Shnong ka Pynter bad ki Village Defence Party (VDP) la dep khlong mynta ka Sngi Lah U Blei bad la pyndep ruh ïa ka post mortem ha katei ka jaka ba la tep ïa u hi, ïathuh u SP ka East Khasi Hills bah Vivek Syiem da kaba ong ruh ba ki pulit mynta ki dang ap ïa ka kaiphod post mortem shwa ban pynïaid shakhmat ïa ka kam kat kum ka aiñ.
ïa ka met la dei ban khlong ha ka jingshisha ha ka Sngi Thohdieng hynrei namar ka jingjur slap kumta ïa ka met la khlong noh mynta ka sngi. “ ïa ka post mortem la pyndep ha ka jaka ba la tep ïa u hi bad mynta ngi dang ap ïa ka kaiphod ban tip bniah la ka jingkhlad jongu ka dei na ka jingshah bom pynmynsaw ne u iap na kiwei kiwei ki daw.
ïa ka met jong une u samla la tep ha ka 7 tarik Iaiong bad na kata ka daw ka met ka la sdang ban pyut.
“ Hooid ka met ka la sdang ban pyut hynrei ngi kyrmen skhem ba ngin ïoh jingtip hi ïa ka daw ka jingiap jongu” ong u SP.
Hadien ba la ïoh ia ka kaiphod bad tip ïa ka daw jongka jingiap, lada ka dei ka jingshah pyniap ki pulit kin sa ujor sha ka ïing bishar ban pyndam noh ïa ka jamin jong u Rangbah Shnong bad kitei ki VDP kiba ïapan jamin lypa bad hadien kata yn sa kem pat ïa ki.
Hooid u la ong ba ki pulit ki ïoh jingtip shaphang kane ka jingshah bom shah tied jongune u samla hynrei ban ong beit ba dei na katei ka daw ba u iap ruh ym pat lah namar ki dang ap ïa ka kaiphod.
“ Ka long ka jingshisha ba ka don ka jingïashoh ia dat shi ïing shisem hadien ba la mih ki jingïania na kata ka daw u Rangbah Shnong bad ki VDP ki sa leit sha katei ka ïing.
Ki nongtohkit mynta ki dang bishar bniah ïa ki video kiba la ring dur, ki nongsakhi ïa ka jingjia. Na baroh ki liang la tohkit bniah naduh ki video ba ring, ki briew kiba sakhi ïa ka jingjia bad dei tad hadien ba la dep tohkit bniah nadong shadong yn sa tip la kitei kiba shah kynnoh ki donkti shisha ne em halor kane ka jingiap.
Kat haduh mynta ki don 11 ngut ki briew kiba la pan jamin lypa na ka ïing bishar kaba kdew ba ki dei kiba ïadon kti lang.
Lah ban pynkynmaw ba u kpa jong une u samla u Netnobiweit Khongsdoh u la ujor ejahar ha Pynursla Police Station ha ka 5 tarik Iaiong uba la kynnoh ba u khun jongu u iap na ka jingshah bom ha u Rangbah Shnong bad ki VDP ka shnong Pynter.