Ïakren pynbeit ki ar District na ka bynta ka rep ki Pnar/Karbi ha khappud Lapangap

Jowai, Jymmang 18: Khnang ban wanrah biang ïa ka jingshong suk shong shngaiñ hapeng ki ar jaitbynriew kata ki Pnar bad ki Karbi kiba don ha khappud bad ka shnong Lapangap bad Tahpat mynta ka sngi ki ar tylli ki bor District kila pynlong ka jingïalang ban ïakren pynbeit khnang ban wanrah ka jingshong suk shong shngaiñ ha kitei ki jaka.
Hadien ka jingïalang u Deputy Commissioner ka West Jaiñtia Hills, u Abhinav Kumar Singh ula pynsngew ba ka jingïakren pynbeit kala long kaba ïaid beit ïaidryntih hapdeng kitei ki ar jait bynriew, haka juh ka por na ka liang ka shnong Lapangap ruh kila shah ïaki nongrep na ka shnong Tahpat ban leit rep ha u Lum pynthor ban thung ïa ki mar rep kiba shipor bad la khang pyrshah ban rep ïa ki mar ba neh slem.
Na ka liang ki bor District ka WJHD kila pynsngew ïa kane ka mat jingïakren ïasuk mynta ka sngi yn leit pynsngew sha ka sorkar jylla lyngba u myntri Rangbah ka jylla ban ïakren bad u Mynrtri Rangbah ka sorkar Assam, ha ka juh ka por shen yn sdang noh ïa ka kam rep ha katei ka jaka kumba long ha ki por mynshwa.
Khnang ban shngaiñ ki paidbah nongrep na ka liang ka sorkar na baroh arliang kila phah pynpoi ïa ki pulit ha kitei ki jaka khappud ban tehlakam ïa ka shongsuk hapeng kitei ki ar jait bynriew bad ban pynbeit ïa ka rep jong ki kan long kaba ïaid beit, la pyntip mynta ka sngi ki nongrep na Lapangap kim pat ïoh rep satia da ka jingkhanglad ki Karbi.
Mynta ka sngi ki paid nongrep na Lapangap hashaw ba kin mut ban lait rep sha ki hali, na ka liang ki paid Karbi kila mih ban phah pynsangeh ïa ki bad kala don ka jingïa siat jri sha ki nongrep ka Lapangap.