La pynsangeh shwa ïa ka eksam MTET ba ngat lum Khanasamari bad SIR ki nonghikai

Shillong, Jymmang 18 : U Myntri Rangbah ka Jylla Conrad K Sangma ha ka sngi Nyngkong u la pynbna ba la pynkynriah shuwa ïa ka Meghalaya Teachers Eligibility Test (MTET), kaba la buh ban long ha ka 29 tarik Jymmang. Kane ka rai ka la mih haba jubab ïa ki jingkyrpad na ka kynhun ki Nonghikai kiba ïakynduh ïa ki jingeh namar ki kam ban pyndep ïa ka kamram kaba la bynshet ha ki.
Haba kren ha ka jingïalang paidbah ha Damas, North Garo Hills, u Myntri Rangbah u la pyntip ba ki Nonghikai dang shen ki la pyntip sha u haba ïadei bad ki jingeh ban pynkhreh ïa ka eksam namar bun ki hap phiah hapdeng ki kamram ba ki dei ban leh ha ki kamra shim klas bad ka jingbynshet kam na ka bynta ka jinglum khanasamari bad ki kam ban leh ïa ka Special Intensive Revision (SIR).
“Ki nonghikai ki khuslai bad ki don hapdeng ka jingbym tip kumno kin leh, haba khmih ïa bun tylli ki kam kiba la bynshet ha ki mynta,” ong u Myntri Rangbah.
“Haba pyrkhat ïa ki jingeh jong ki, Nga kwah ban pyntip ba ïa ka eksam MTET la pynkynriah shuwa. Ki Nonghikai kim donkam shuh ban khuslai. Ngin sa bishar ïa ka jinglong jingman baroh bad sa pynbeit ïa ka por bad ka tarik kaba biang ban pynthikna ba kin ïoh ïa ka por kaba pahuh ba kin pynkhreh.”
Nalor ka jingpynbna ïa kane ka jingpynkynriah ïa ka eksam, u Myntri Rangbah u la pyndonkam ruh ïa ka rynsan ban kren halor ka lynti ïaid jong ka kam pule dangle ba kham ïar ka Jylla. U la ïaroh ïa ki nonghikai ka Jylla namar ka jingïai shah ïa ki jingeh bad ka jingaiti lut sha ki Khynnah ka Jylla, khamtam haba ïakhun ïa ki jingeh ba mih na ki rukom treikam kum ki jingduna ha ki jingai jinghikai pyntbit ha ka kam.
Haba pynpaw ïa ki prokram kiba khlain jong ka Sorkar bad ka jingkynshew pisa kaba bun ha kine ki snem ba la leit, kaba la kyntiew kyrdan bha ïa ki jingtei jong ki Iingskul bad nang pynbun ïa ki jaka pule, u Myntri Rangbah u la mynjur da kaba shai kdar ba haduh mynta hi kam pat da long kaba hun ne kaba biang”.
“Haba ïadei bad ka jingbun, ngi la don bun ki skul, hynrei ngi dang sah shadien ha ka rukom hikai kaba kham paka,” kynthoh u Conrad.
“Ban kyntiew ïa ka kyrdan pule (standard) kan shim por, hynrei ngi la kut jingmut pura ban pynthikna ba kan urlong. Hynrei, kane ka jingpynkylla kan ym shong tang ha ka Sorkar lane ki Nonghikai. Ka donkam ïa ka jingïatreilang kaba kynthup lang ïa baroh ha kaba ki Kmie Kpa bad baroh ki kynhun ba don bynta, ki ïatreilang ban kyntiew ïa ki khynnah pule jong ngi”.