Jowai, Lber 17 : U MLA ka Shongpung u Ma Comingone Ymbon, ha ka Sngi Saitjain, ula plie paidbah ïa ka jingkieng Doi Doi ba la shna halor ka wah Umyurem ha Shangpung, West Jaintia Hills.
Kane ka jingkieng, la shna ha ka jnglut ba 49,98,700 tyngka lyngba ka Ophis u Deputy Commission hapoh ka District Rural Development Agency (DRDA).
Kane ka jingkieng ka dei ka lynti ba kongsan na shiliang sha shiliang ka wah Umyurem kaba pynïasoh ïa bun ki jaka rep kiba phiah da ka wah. Kane ka jingkieng ka la wanrah ka jingkmen ïa ki nongrep bad ki nongshong shnong kiba ju leit sha ki jaka rep.
Da ki snem, ka leit ka wah sha ki jaka rep ka long kaba jynjar bha, khamtam ha ka por Lyiur ba heh um, kaba la ktah jur ïa ki nongrep. Kane ka jingkieng la khmih lynti ba kan ai ïa ka ïaid ka ïeng kaba shngaiñ ïa ki nongshong shnong kiba leit rep leit riang manla ka sngi.
U Ma Comingone ula pynpaw ba kane ka project jingtei ha ki shnong nongkyndong ki shim ïa ka bynta kaba khraw bha ban kyntiew ïa ka kamai kajih bad pynsuk ïa ka leit ka wan ki nongshong shnong.
Nalor kane ka jingkieng Doi Doi, u Ma Coming ula pynbna ruh ïa ki kam pynroi na ka bynta ka Shangpung ba kynthup ïa ka jingsiang rong ïa ki surok shnong, ka jingthied ïa ki kali lum niut bad kiwei kiwei ki jingdonkam kiba kot 15 klur tyngka.
