Naduh u 2022 ba ladep ban shna, tap sañium pynban ka Langpih Sub Centre

Nongstoiñ, Jymmang 17: Ka Langpih Sub Centre kaba la tei ïa ka building naduh u snem 2022, hynrei haduh kine ki sngi ka dang sah kumjuh khlem treikam ei ei bad ki paidbah na ka tei ka thaiñ ki shu peit tang ki khmat ba ka building jong ka sorkar la shu tap da ki sañium.
Lah ban pynkynmaw ba na ka liang ka Sorkar ka la mynjur ban buh ïa kane Health Sub-Centre ba thymmai ha Langpih naduh ki snem ba kham mynshwa, ha kaba na ka liang ka Sorkar ka la dep tei ruh ban tei ïaka building jong katei ka Sub Centre ba thymmai naduh u snem 2022. Hynrei haduh mynta kane ka sub-centre kam shym pat la don wat iwei ruh I nongtrei bad mynta la dep sop da ki sañium ka bym I kop shuh ban ong ba ka dei ka Ïing ba la shna na ka bynta ka koit ka khiah.
U Bah Serbilin Lyngdoh President ka FKJGP Ri Muliang haba kren bad u nongthoh u la ong, “Ka seng ka dap ka jingsngewsih kaba jur ban ïohi ba ka dong ka thaiñ kan shah iehbeiñ haduh katne, khamtam ka thaiñ Langpih kaba long ruh kawei na ki jaka kaba jur bha ki briew kiba ju ïoh ïa ka malaria, typhoid bad kiwei.Pynban kumba long haduh mynta ka shu sahkut kumto khlem treikam ei ei”.
Ka jingdawa ban ïoh ïa ka Health Sub-Centre ha ka thaiñ Langpih ka long ka mat kaba la iaid lynti jrong bha, ha kaba na ka liang ka seng ngi la ju dawa naduh ki snem ba mynshwa bad ngi sngewkmen ban tip ba ka Sorkar ka la mynjur ban buh ïa kane ka Sub-Centre ha Langpih. Hynrei ka long kaei kaei kaba ngim lah ban pdiang ban shu buh kai ïa kane ka building khlem da pyndonkam ïa ka kumba la thmu”.
“Ngi dap da ka jingsngew bitar ruh ba haduh mynta kane ka Sorkar kaba ju kop ïa ki jinglah jong ka ban wanrah ïa ki kam pynroi, hynrei kam lah pat ban pyntreikam noh wat tang ïa I Health Sub-Centre ha ka thaiñ nongkyndong. Na ka liang ka seng ngi dawa jur ïa ka Sorkar lyngba u Myntri ba peit Incharge ïa ka Health Department Bah Wailadmika Shylla, ba kam long kaba dei ban shu buh Ïing jah ïa ki Ïing Sorkar haduh lai bad saw snem khlem da pyntreikam ïa ki”.
“Ngi la ju thoh na ka por sha ka por sha ka Office u District Medical & Health Officer Nongstoiñ, ban kyrpad ban pyntreikam noh ïa kane ka Health Sub-Centre ha Langpih. Hynrei kine ki jingthoh baroh ki shu kut khlem treikam ei ei, kaba pyni ïa ka jingbym kheiñ snep jong kita kiba don ha ka bor ïa ki jingpynsngew jong ki Officer jong ki hi na ki District bapher bapher kiba ju pynsngew ïa ka jingdawa jong ngi ki paidbah na ki dong bad ki thaiñ bapher bapher”.
“Kumba ka paw kane ka sorkar MDA 2 ka pynbor hi ba ki paidbah kin leit pynklumar bad leit tur shwa ha Secretariat na ka bynta ban ïoh ïa ki jingdawa jong ki ?.Hynrei shwa kata, ngi dawa jur ba ka sorkar kan pyntreikam bad buh noh ïa ki nongtrei hapoh ka Health Centre ha Langpih lym kumta ym banse ban tur sha Secretariat”, ong u Bah Serbilin Lyngdoh President FKJGP Ri Muliang.