Shillong, Naitung 17 : Ka KHNAM State Youth Wing ka la ong ba ka jingkhang jong ka Transport Department ka jylla ïa ki Rapido Bike ban kamai katkum ka kyndon aiñ jong ka MV Act 1988, Section 66, Sub section 1, ka la pynduh kam ïa ki hajar ngut ki samla kiba juh im jah kpoh na kane ka kam, khamtam ha kine ki por kyrduh kam jong ki samla.
“ Ka aiñ ka don ha kawei ka liang, hynrei haba peit pat sha kawei ka liang, ngi la ïohi ba ka jingdon jong ki Rapido, nyngkong eh ka kham tad ban ïa kiwei pat ki kali kamai, kaba ar, ki Rapido ha teng ki ïarap ïa kito ki ba kwah ban set ïa ka kali jong ki ha iing ban lait ka ka jingdheng kali bad kaba lai ka ïarap ïa kito ki ba kham kyrkieh kam wat ïa ki khynnah skul ruh ka la ïarap ha ki khep ba donkam bad kaba saw kaba kham kongsan ka long ba ka ïarap ïa ka kyrduh kam kyrduh jam ki samla,” ong ka kyrwoh ba la phah da u President ka Youth Wing, Bah Thomas Passah.
Shuh shuh u la ong ruh ba katkum ka Riti Synshar jong ka Ri, lyngba ka Artikil 41, bynta ba IV, ka ai jingmut ïa ki jylla ban wanrah ki lad ki lynti ban pynthikna ïa ka hok ban kamai, ki jingtrei jong u paidbah haba kyrduh kam.
“Namarkata ka KHNAM State Youth Wing ka ban jur ba ka sorkar jylla ba kam dei ban peit tang ïa ka MV Act hynrei ban phai khmat ruh sha ka Artikil 41 jong ka Constitution bad ban shna ne wanrah ki polisi na ka bynta kiba kamai Rapido ka ban long ruh kum ka jingai mynsiem ïa ki samla ban ieng ha la ki jong ki kjat,” bynrap biang ka kyrwoh.
Ha kajuh ka por, katei ka party ka la kdew ruh ba la bun ki jylla ha Ri India ki la don ki polisi bapher bapher halor ki Rapido Bike bad kam don jingeh lada ka sorkar ka thmu shisha ban ïarap ïa ki samla jong ka jylla.
