Yn ïakhun MLA-2023 u Ma Lasting Suchiang na ka party AITC

0

Jowai, Naitung 17: Ka seng saiñ hima sima jong ka All India Trinamool Congress (AITC) Meghalaya ha kane ka sngi Saitjaiñ kala pdiang sngewbha ïa u ma Lasting Suchiang uban long kum u kyrtong ban ïakhun ïa ka Election MLA-2023 na ka 4-Mowkaiaw Constituency ha ka jingïalang paidbah kaba la long ha Laskeiñ West Jaiñtia Hills District.
Ha kane ka sngi la wan ban ïadonlang naduh u Dr Mukul Sangma (MLA) uba dei u Parliamentary leader ka AITC, u President ka MPTCC bah Charles Pyngrope (MLA), u Vice President MPTCC bah G.B. Lyngdoh (MLA), Dr. H.H. Mohrmen, ma Lawyerson War Convener TMC West Jaiñtia Hills, ki lai ngut ki MDC na ka Garo Hills, ki paidbah ka shnong kynthup ïa ki riew rangbha ki longkmie, ki khun samla bad ki heh kiba rit.
Ïa ka jingïalang la pynïaid da u ma Nicholas Suchiang u General Sectryary ka shnong Laskeiñ, u ma Lasting Suchiang haka jingkren ula pynsngew hadien ba ula resign noh na ka kam sorkar kum u Lab Technician ha ka CHC Laskeiñ, ula pynbna ba u don shisha ka jingthrang naduh mynshwa ban rung noh sha ka kam saiñ hima sima na ka bynta ban ai ka jingshakri kaba bha tam ïaka Constituency bad ïa ka jylla hi baroh kawei.
“Nga la shlur ban mih shakhmat ban peit ïa ka jingeh jong uba duk uba ïa kynduh shibun ki jingtynjuh ha ka jingim khamtam ha ki thaiñ nongkyndong” ha ka juh ka por u ai ka jingïaroh ïa ki paidbah kiba la wan khnang sha kane ka sngi kala long kum ka dak jong ka jingai mynsiem ïa u bad u kyrmen skhem ba un poi sha ka thong jong ka jingjop.

Leave A Reply

Your email address will not be published.