Shillong, Naitung :Ka Khasi Department jong ka Shillong Commerce College ka la pynlong ïa ka jingkynmaw burom ïa ka lyngkhuh sngi ïap ba 187 snem jong u Tirot Sing ha ka 16 tarik Naitung 2022.
Ha kane ka sngi la ïa donlang I Principal I DrMrs S. Sen, u Rev Dr O.L.Snaitang kum u Riew shemphang kumjuh ki nonghikai bad ki samla pule.Na ka liang I Dr Mrs S.Sen I la ai ka jingkren lyngkot shaphang u Tirot Sing.
Katba na ka liang u Rev Dr O.L.Snaitang u la ai ïa ka jingkren ba kham bniah shaphang u Tirot Sing naduh ka tynrai, ka longïing longsem bad ka jinglen lade jong u na ka bynta ka Ri bad ka jaidbynriew.
Shuh shuh u la batai ruh ba u Tirot Sing u la kiew ïa ka khet syiem naduh ka por ba u dang kham khynnah ha ka rta, pynban kum u syiem u la lah ban pynïaid bad synshar bha ïa la ka Hima da ka ba u tip bha ïa u pud u sam, ïa la ki briew bad ïa ki aiñ ha ka synshar ka khadar. Ka jingkren jong u ka la aijingmyntoi shibun eh khamtam ïa ki samla pule.
