Ka dei ka jingjia ba sngewsih, ong u Myntri ba hap pynsangeh shwa ïa ka eksam NEET UG

Shillong, Jymmang 15 : U Nongai Ktien ka sorkar jylla ba dei ruh u Myntri ka Koit ka Khiah, Bah Wailadmiki Shylla u la ong ba ka rai jong ka National Testing Agency (NTA) ban pynsangeh noh ïa ka eksam NEET UG 2026 ha baroh kawei ka ri ka long kaei kaei kaba sngewsih.
Ha kajuh ka por u la kyntu ruh ïa ka sorkar pdeng ba kan leh da kaba tyngeh ïa kito kiba donkti ha katei ka kam ban pynïoh biang pat ïa ka jingshaniah jong ki samla pule kiba shah ktah.
Na ka liang u Myntri haba jubab halor ka jingmih ki khubor ba ka don ka jinglait tuh ki jingkylli ha ki katto katne ki jaka, u Myntri u la ong, “Ka long kaei kaei kaba sngewsih ban ïohi ba jia kum kine.
Ha kajuh ka por, u Myntri u la ong ba ki don ka jingsngewsih namar bun bha ki samla na ka jylla kiba la pynlut ka por bad ka bor hynrei mynta ki hap ban ngat lang ha katei ka apot.
“Kumta, nga sngew ba kane ka dei ka jingjia kaba sniewbok hynrei ngim lah ban leh ei ei namar kadei kaba leh da ka NTA. Nga kwah ruh ban ïohi ba dei ban leh da kaba tyngeh ïa kito kiba donkti,” bynrap biang u Myntri.
Lah ban kdew hangne ba ka NTA ka la pynsangeh noh ïa ka eksam NEET UG 2026 ha baroh kawei ka ri hadien ba ki la lap ba ka don ka jingleh thok bad ka jinglait tuh ki jingkylli ha kiba bun jaka kaba la ktah ïa ki lak ngut ki samla pule kiba kwah ban pule doktor.