Shah pynkyllaiñ Jelebi ki nonghikai, pynbna ka sorkar ban buh shabar ïa ki nongtrei na ka CPF 1969: Babu Boswell

Shillong, Jymmang 14: U President ka KJDSTA u Babu Boswell Pala u la ong ba baroh ki nonghikai bad kiba trei hapoh ki skul deficit ki kwah ïa ka Sorkar ba kan pyntreikam beit ïa ka Scheme 2023 bad ïa ka National Pension Scheme (NPS) kumba la sdang naduh nyngkong bad ba dei ban pyndep pura ïa ka kumba la angnud da baroh.
Haba kren sha ki lad pathai khubor u Babu Boswell Pala u la ong ba ka long kaei kaei kaba sngew thamula ba ka Sorkar jylla ka wanrah ban pyntreikam jubor da ka Meghalaya Non Government School and college Employees Centralised Provident Fund Scheme 2026 bad kumjuh ruh ban ong ba ki nonghikai bad nongtrei deficit kin don noh shabar jong ka Central Provident Fund (CPF) 1969, kaba dei ka jingpynbna kaba ki la shim hadien ba ki nonghikai ki la mihnoh shabar ha ka jingïalang ba la long ha ka 6 tarik mynta u bnai ha Secretariat.
U la ïathuh ba ka Sorkar ka khot jingïalang ïa kiba trei deficit tang ha shwa shi sngi ban pynlong ïa ka jingbishar jong ka Meghalaya High court bad kynnoh ruh ba ka Sorkar ka la kwah ban shu leh da ka bor ban shim ruh ïa ki rai jingïakren khlem da donlang ki nonghikai bad ki nongtrei deficit.
Ula ong ba ka sorkar ka la dep pynthikna ba kan sa khot biang sa shisien ïa ka jingïalang ban ïadonlang da baroh ki seng deficit, nangta na ka SBI kiba khlem shah khot ha ka jingïalang ba la dep, hynrei la shah pynkyllaiñ jelebi pynban naba ïa baroh ki jingïakren ladep ban shim rai da kiwei ha ka jaka jong ki nongtrei deficit, kumta kam don jingmut ban ïashim bynta ha ka jingïalang ba khot da ka tnat pule puthi ha ka 14.05.26, naba la pynmih ka jingpynbna ban buh shabar na ka CPF 1969 bad ba ka sorkar ka ong ban pynïaid shakhmat ïa ka skhim 2026 yn sa shim rai hadien ka jingbishar ka Ïingbishar Meghalaya, kumta ki nongtrei deficit ki ieh ha ka jingstad ka jingshim bishar ka High Court.
U la pynpaw ruh ka jinglyngngoh halor ka jingïalang ba shalyndet ba la ïakren da kiwei pat ki briew na ka bynta ki jingeh jong ki nonghikai hadien ba ki la mih noh shabar napoh ka jingïalang ba la pynïaid da u Commissioner Secretary ka tnat pule puthi u Vijay Kumar Mantri ha ka 6 tarik mynta u bnai ha kaba hadien pat la pynmih ïa ka jingpynbna ba dei ban don noh shabar ka CPF 1969 naba kumba long mynta dei tang ki nongtrei Deficit kiba ïoh CPF.
Kumta u la ong ba dei na kine ki jingleh jong ki bor bahalor bad kiba don ha ka bor khlem da pyrkhat ia ka jingeh jingsngewkhia ki nonghikai bad nongtrei deficit ki la rai ban ym leit sha ki jingïalang ba la khot da ka tnat pule puthi bad kumjuh ruh ki shaniah beit ha ki rai ba stad jong ka Meghalaya High court.
Haba pynpaw ïa ka jingsngewkhia ha ka jingïadonlang ki briew ki bym dei ki nongtrei deficit ha ka jingïalang bad kumjuh ruh ka jingpynsniewdur ïa ka Board of Trustees kaba la wanrah ïa ka jinghiar kyrdan bad kumjuh ruh ka jingbym khot ïa ka seng ki nonghikai Deficit haba ïadei bad ki jingeh bad kumjuh ruh ha ka jingïalang kaba la long ha ka 6 tarik mynta u bnai.
“Kaba lyngngoh ka long hadien jong ka jingïalang kaba la long ha ka 6 tarik mynta u bnai ki don sa kiwei pat kiba don hapoh ka jingïalang, katba ma ngi kiba don ha ka jingïalang ngi la mih noh na ka jingïalang, kine ki shim ïa ki rai, ki ïakren ïa ki kam wat hapdeng ka jingbym don jong ngi ki nonghikai bad ki nongtrei deficit bad dei halor kane ba la shu kynthih sha ka jingshim rai kaba pynsniewdur ïa ngi ki nongtrei,” ong u President ka KJDSTA.
U la ïathuh ba kane ka jingleh jong ka tnat kaba la pynmih ïa ka jingpynbna ba la buh shabar ïa ki nongtrei na ka CPF 1969 ka long kaei kaei kaba bakla bad kaba bakla shibun bha bad kane ka pynsniewdur ïa ki rukom treikam jong ka tnat pule puthi baroh kawei.
“Kumno ka sorkar ka wanrah ïa ka jingpynbna ba la buh shabar jong ka CPF 1969 ïa ki nongtrei deficit bad kumno pat ha ka jingïalang la kren ba ïa kiwei pat ki rai yn sa ïakren ynda la khot ïa ka jingïalang kaba kham biang bad kaba beit kaba la long katkum ki rukom badei bad ka jingpyntrei jubor ïa ka skhim 2026 haba ha ka jingïalang la ïathuh ba lada kwah ban pyntreikam shakhmat ïa kane ka skhim yn shim hadien naba kane ka kam ka dang don hapoh ka Ïingbishar Meghalaya High Court bad haoid haba kane ka dang sah hapoh ka Ïingbishar balei ka sorkar ka kyrkieh ban pyntreikam noh ïa kane ka skhim 2026 kaba la shah kyntait ha ki nonghikai bad nongtrei deficit, kumta ngi ieh hapoh ka jingstad jong ka Ïingbishar ban bishar halor kane ka jingpynkyllaiñ jong ka sorkar ïa ki jingeh ba mad ma ngi bad kumjuh ruh kito kiba la shongthait,”
Ka KJDSTA ka la buh jingkylli ruh ba balei ka SBI Mutual Fund, kaba lah ithuh kum ka Portfolio Manager jongka CPF ha ka 16 tarik u Risaw 2025, kam shim la shah khot sha ka jingïalang kaba la long ha ka 6 tarik u Jymmang 2026.
“Ngi kwah ruh ban tip na ka sorkar, kaei kaba la jia ïa ka SBI Mutual Fund kaba la shah ithuh kum ka Portfolio Manager jong ki Non-Govt. Schools & Colleges Employees Central Provident Fund ha ka 16 tarik u Risaw 2025. Namar ha ka jingïalang ha ka 6 tarik u Jymmang 2026, ym shim la don kino kino ki briew na ka SBI Mutual Fund kiba la shah khot, katba ki nongmihkhmat na kiwei pat ki Bank kila wan ban ïashimbynta” ong u Babu Pala.