Naduh West Bengal wan ki trok ban kit mawshun na Dawki sha Bangladesh: FKJGP

Shillong, Jymmang 12: Ka FKJGP Sengkmie hapoh ka jingïalam jong u Assistant General Secretary u Bah Reginald Thabah bad kumjuh ruh ka FKJGP Sohra Circle ha ka sngi baar ki la leit ban kynduh ïa u CEM ka KHADC u Bah Winston Tony Lyngdoh halor ki artylli ki mat, ha kaba kawei kadei ka jingïoh thep tender ki Security Agency ba nabar jylla bad kawei pat kadei halor ka jingïoh ban wan kit mawshun jong ki trok naduh West Bengal bad kiwei ki trok na kiwei pat ki jylla, ban kit mawshun na Dawki ban leit shalan sha Bangladesh bad kumjuh ruh ban pynduh laisen khaïi jong ki bar jylla ba khaïi sha thaiñ Majai bad kiwei ki thaiñ.
Haba kren sha ki lad pathai khubor haba ïadei bad ki kam Security Agency u Bah Reginald Thabah u la ong ba kane ka jingïoh lad ban thep tender ki Agency na bar ka la ktah ha kaba ki don kiba trei ki la ujor ba ki la shah khniot bad kabym iahab katkum ka dor.
U la ïathuh ba halor kane u CEM u la pynpaw ba kan shem jingeh ïa ka KHADC ban khang naba ki Security Agency ba na jylla kim treh ban thep tender bad ha kajuh ka por ba kine ki kam barabor ki wan na ka sorkar pdeng ka long kaba eh ban tuklar, hynrei lada kiba na jylla ki kloi ban iashim bynta ha ki jingkhot tender lada ki dei kiba la lah ban trei ia ka kam, yn ai shwa ia kiba na ka jylla.
Haba ïadei pat bad ka jingai laisen khaïi ka FKJGP Sohra Circle lyngba u President u Bah C Kharmih u la ïathuh ba na ka daw ka hukum jong ka ïingbishar ba baroh ki kali kit mawshun kin hap pynbiang ïa ki kot ki sla, kumta bun na ki trok trai jylla ki la hap sangeh naba ki dang pynbiang ki kot ki sla, hynrei naba ïohi ïa kane ïoh shim kabu ki trok nabar jylla kum na West Bengal, Nagaland, Assam ban kit mawshun na Dawki sha Bangladesh.
Kumta ka seng ka kyrpad ïa u CEM ban buh biang ka khyrdop talasi bar jylla sha ki thaiñ Majai, Ichamati bad kiwei. “Ngi kyrpad ïa ka ophis ba kan pynduh noh ïa ki laisen khaïi kiba dang treikam bad ban ym ai shuh ïa ki laisen khaïi kiba dang thymmai sha ki bar jylla la ka long ha kino kino ki kam khaïi pateng kum ka kam khaïi mawshun sha Bangladesh, ki dukan die marbam mardih bad kumjuh ruh ban pynduh laisen ïa ki trok kiba leit kit mawshun ban shalan sha ka Ri Bangladesh, nangta ki Sumo, ki taxi kiba kamai na Majai, Ichamati sha Shillong namar katkum ka jingïaid jong ka por kiba bun ki samla jong kane ka thaiñ ki la lah ban trei ïa kum kine ki kam,” ong u President ka FKJGP Sohra Circle.
U la ong ka Bynrap kaba Hynriew (6th Scheduled) ruh ka kren shai ha ka Trading by Non-Tribal Regulation Act 1959 kaba ong ba lada don kino kino ki kam ba la lah ban trei da ki trai jylla dei ban pynduh noh ïa ka jingai laisen ïa ki bar jylla.
Utei u nongïalam u la ong ba ha kaba ïadei bad ki kam wan kit mawshun jong ki trok nabar jylla ban khang ïa ki laisen, u la ong ba u CEM u la ïathuh ba kane kam hap shuh ha ka jingpeit jong ka KHADC naba ïa ka permit ba ki la ïoh kadei ban tuklar hi da ka tnat Transport jong ka sorkar bad dei maka ka ban pynbeit ïa kane ka bynta.
U la ong ba u CEM ruh u la pynpaw ka jingïatreilang ha kaba ïadei bad ka jingdonkam ban phah ïa ki Enforcement sha ki thaiñ Majai ban ïoh talasi biang ïa ki laisen khaïi bad ïa kane yn sa leh ha kine ki por ban sawan.
“Na ka liang ka seng ka kloi ban ai jingkyrshan ne ban synranlang ïa ki pulit Enforcement ka KHADC lada ki wan ban khynra ïa ki laisen khaïi sha kine ki thaiñ,” ong u Bah Kharmih.