Shillong, Jymmang 12 : Da kaba khot ïa ka High-Speed Corridor kum ka “jingkyrkhu” ïa ka ri-lum Jaintia, u Myntri barim bad MLA ka UDP na Khliehriat u Bah Kyrmen Shylla, ha ka Lah Sngi U Blei u la ong ba kane ka project kan pynsuk ïa ka leit ka wan, kan pynduna ïa ka por leit jingleit, bad kan pynduna ïa ka jingdheng kali ha kylleng ka East Jaiñtia Hills bad shabar jong ka.
“Haba phai sha ka High Speed Corridor, kane kam dei tang na ka bynta ka East Jaiñtia Hills marwei, ka long na ka bynta ka jyllla bad ka ri hi baroh kawei,” ong u bah Shylla haba ïakren bad ki nongthoh khubor.
“Ban don ïa ka High Speed Corridor kaba ïaid lyngba ka East Jaiñtia Hills ka long ka jingkyrkhu kaba khraw ïa ki paidbah jong nga bad ïa ki paidbah ka Ri Jaiñtia. Kano kano ka jaka ba ka project ka ïaid lynti, kan dei ka jingkyrkhu ïa kito ki jaka namar kane kan pynsuk ïa ka leit la wan, pynduna ïa ka por leit jingleit bad khamtam eh kan wanrah ïa shibun ki jingkylla” ula ong.U bah Shylla u la kdew sha ki jingduna jong ki surok kiba don mynta. “Ka surok kaba don mynta ka long kaba rit bad kaba khim. Da kaba don ïa High Speed Corridor, kan pynduna ïa ka jingdheng kali. Na ka bynta ki nongleit nongwan kiba wan sha Shillong bad ri-lum Jaiñtia, kan long kaba suk bad kaba stet bha,” u la ong.
“Kata kan long ka jingnoh synñiang kaba khraw bha ïa ki paidbah ka Jylla” ula ong. Halor ka kam thied jaka, une u nongthaw aiñ u la ong ba ka sorkar ka la kut jingmut ban ïada ïa ki hok jong ki nongshong shnong. “Haba ïadei bad ka bai lutksan na ka bynta ka jaka bad baroh, kata ka dei ka jingkular jong ka tnat bad ka sorkar ba ym dei ban knieh ïa ki hok jong ki paidbah. Ki dei ban ïoh ia baroh ka pisa kaba dei ka hok jong ki,” u la ong.
