Shillong, Jymmang 12 : Ka National People’s Party (NPP) hynne ka sngi Baar, ka la dawa ïa u Chief Executive Member (CEM) ka North Cachar Hills Autonomous Council (NCHAC) u Debolal Garlosa ba u dei ban pan map bad pynkylla noh ïa ka rukom kynthoh ka jongu ïa ka NPP ba ka dei ka “Team B” bad u dei ruh ban pan map hapoh jong ka 48 kynta lym kumta yn hap ïaid da ki lynti jong ka aiñ.
U National Working President ka NPP u James K Sangma ula pynrem jur ïa ka jingkynthoh u Garlosa ha ka jingrakhe ka NCHAC ïa ka Platinum Jubilee ha Haflong ha ka 11 tarik u Jymmang, bad ong ba ka jingkynnoh ka dei kaba bakla, ka jingthmu ban pynbud nam bad kaba la ïalam da ka buit leh politik”.
“Ka jingpyrshang u Debolal Garlosa ban pynman ïa ka seng NPP kum ka ‘Team B’ kam dei satia tang kaba bakla pura, hynrei ka pyni ruh ïa ka jinglong bym shngaiñ bad ka jingduna ha ka rukom pyrkhat” la ong u Sangma.
“Haba u nongïalam seng saiñ pyrthei, na ka rynsan jong ka ophis treikam paidbah, u jied ban kyrsum ha ka jingwanrah ïa ka rukom pyrkhat ïasuhbuit, ki khana thaw bad ka nongrim kaba tad dor ha ka jaka ban leh ïa ki kam kiba la rangbah ka jingmut ka jingpyrkhat ha ka kam synshar paidbah, ka kren ïa kaei kaei kaba u don ïa ka jingthmu kaba nalade hi shaphang kata ka seng kaba u thmu ban kynthoh ne pynibor” ula bynrap.
“Ka National People’s Party kam dei, kam shym lah long bad kan ym long hi ruh bad da lei lei satia kan ym dei ka ‘Team B’ jongno jongno ruh” ong u Sangma. Ula ong, ba ka NPP ka dei ka National Party kaba don ïa la ka nongrim treikam bad ka thong.
“Ka jingai jingmut ba ka NPP ka donkam ïa ka jingpynshisha, jingmynjur ne ka jingbthah na ka bynta ka rukom treikam na kawei pat ka seng saiñ pyrthei hashwa ban ïakhun ïa ka elekshon kam dei satia tang kaba shu thok, ka dei ka jingktah mationg ïa ka jingstad jong ki nongthep vote” ula ong.
U Sangma ula pynshai ba ka jingrai ban pynïeng ïa u Daniel Langthasa kum u kyrtong ka NPP na Haflong (ST) Assam Assembly election 2026 ka dei kaba la shim rai laitluid.
“Kam shym la don kano kano ka jingïakren, jingïasyllok, kano kano ka jingïasngewthuh jingmut bad kano kano ka jingïapynbeit seng saiñ pyrthei la kadei bad ka BJP ne bad kiwei pat ki seng saiñ pyrthei ha kaba ïadei bad katei ka jingshim ïa ka rai” ula ong.
Ula ong ba ka jingkynnoh u Garlosa ba kala don ka jingiakren kaba kynthup ïa u National President ka NPP uba dei ruh u Myntri Rangbah ka Meghalaya u Conrad K. Sangma kadei tang ka jingthaw khana thok.
“Ban shu kynnoh khlem ka nongrim ne khlem ki sabut ka dei ka jingbym don satia ïa ka jingkitkhlieh, ka jingpynthobria bad ka bym ïahap ïa uno uno ruh uba bat ïa ka kyrdan treikam ha ka ophis kaba la ithuh da ka rit synshar” ong u James Sangma.
“Ka paw, ba ha ka jaka ban kren ïa ki jingeh bad ïa ki jingsngewkhia jong ki paidbah ha kaba ïadei bad ka kam synshar khaddar, ka roi ka par bad ka jingangnud jong ki paidbah ka Dima Hasao, u Garlosa ula jied pynban da ka lynti ïaid kaba klumar jingmut, ka jingbym don ïa ki jingtip kiba thikna bad ban pynthohbria ïa kiwei” ula bynrap.
“Ka politik jong ka jingbym shngaiñ ka ju pynmih ia kum katei ka rukom hi, haba uwei um lah ban pynrem ïa u nongïaleh pyrshah ha ka kam saiñ pyrthei, kumta u pyrshang ban pynduh jingithuh lyngba ki khana kiba shu thaw ne mutdur”.
U Sangma ula maham da kaba ong, “Ka National People’s Party ka dawa ba u Debolal Garlosa u dei ban kylla noh mardor ïa ka rukom kynthoh ka jongu kaba dei kaba bakla bad ban phah ïa ka jingpan map na ki paidbah lyngba ki lad pathai khubor hapoh jong ka 48 kynta.”
“Lada u pulom ban leh ïa katei, ka seng kam banse ban wad ïa baroh ki lad ki lynti jong ka aiñ, kynthup ban dawa ïa ka bai mynraiñ khmat pyrshah ïa u ha ka kyrdan shimet ka jongu” ula byrngem.
“Ki paidbah ka Dima Hasao ki dei kiba la shemphang ha ka kam saiñ pyrthei, kiba la ih bha bad kiba lah ban shim ïa ka rai. Kin ïohi ba lyngba kitei ki jingpyrshang kiba kutlad kum ka jingai ïa ki jingtip ki bym don ïa ka jingshisha” la ong u Sangma bad ka bynrap ba ka NPP ka ïengskhem kum ka seng saiñ pyrthei kaba treikam laitluid bad kaba bteng ban shim ïa ka jingkitkhlieh ïa ka kam synshar paidbah, ki hok jong ki riewlum, ban ïada ïa ka riti synshar ka ri, ka roi ka par bad ban pynurlong ïa ka jingangnud ki paid riewlum”.
