Ym pat don ba wankam trai ïa ka metïap ba la sei na thliew dewïong na Mulait Bri-Sumer EJHD

Khliehriat Jymmang 12: Katkum u kyrwoh khubor ba la pyllait da u Superintendent of Police East Jaiñtia Hills District, u Pankaj Rasgania, IPS la ong ba ïa ka met iap jong uwei u briew u ba la lap na ka thliew dewïong kaba ym pyndonkam shuh ba la sei da ka kynhun ki SDRF myn ha ka 10 tarik mynta u bnai ym pat shym don ba wan ban kam trai ïa ka met bad hadien ba la pyndep ïa ki kam kiba katkum ka aiñ, ïa ka met ïap ba la pyut la buh ha ka jaka buh met ïap ha civil hospital Khliehriat.
La ong ba utei uba iap u dei u don ka jingjrong kaba kumba 5 phut, ka kyrta kaba kumba 30 haduh 40 snem kyrta, ka sniehdoh kaba lieh, u phong da ka patlun tracksuit rong blue, ka jacket tracksuit rong blue bad ym tip satia ïa ka kyrteng jong u.
Shuh shuh, ki khubor pulit ki iathuh ba myn ha ka 9 tarik mynta u bnai jymmang ki la ioh jingtip lyngba ka phone na u rangbah shnong jong ka shnong Mulait Bri-Sumer ba ka don kawei ka met iap kaba per halor um ha kawei ka thliew dewïong kaba la shu ieh khlem pyndonkam shuh kaba don hapoh shnong bad mar mar ki pulit kiba na Mooriap BOP ki la leit poi sha katei ka jaka bad pynlong ïa ka jingtohkit bad jingwad bniah bad ki la lap shisha ïa ka met iap hapoh katei ka thliew dewïong kaba jylliew kumba 50 phut shapoh, kumta na ka liang ka tnat pulit jong ka East Jaiñtia Hills District ka la pyntip sha ka kynhun SDRF bad da ka jingiarap kane ka kynhun ba la lam khmat da u Sub-Inspector D. Kharbhih la lah ban sei ïa katei ka met iap.
Na ka liang ka tnat pulit ka kyrpad ïa ki paidbah ba lada don mano mano kiba don jingtip shaphang utei u ba iap kin sngewbha ban ai jingtip sha ki pulit.