“Kham stad ki paid jong ka Nartiang ban ïa ki paid Nongkrem” ther kylla u Dy.CM ïa u President ka VPP

Shillong, Jymmang 11 : U Symbud Myntri Rangbah bad MLA ka Nartiang u Ma Sniawbhalang Dhar ula kyntait ban pdiang ïa ki jingkynnoh u President ka Voice of the People Party (VPP) bah Ardent M Basaiawmoit ba ula “sdang ban pyntreikam haba shai ïa ki skhim pynroi namar ka jingtieng ïa ka VPP” da kaba ong ba ki nongthep vote jong u ki dei ki nongbishar kiba biang tam ïa ki kam kiba u la leh bad trei.
“Balei ngan hap ong bad balei ngan hap batai ruh sha ki paidbah” ong u Ma Sniawbha haba jubab ïa ki jingkynnoh u Bah Ardent ha ka jingïalang paidbah ba la pynlong dang shen ha Jowai, West Jaintia Hills.
“Ki briew jong nga ki la jied la saw sien lynter ïa nga kum u MLA jongki bad u Ardent nga sngew ba ula shah jied arsien bad shah rem bad wanphai biang. Ka pyni ba ki briew jong nga ki kham stad ban ïa ki briew ka Nongkren constituency, tang katne ngan ong”.
Haba pynksan ïa ka record lajong, u National Vice President ka NPP ula ong “La nga treikam haba shai ne em, ki briew jong nga ki tip kham bha. Ym don mano mano ba lah ban batai na ka bynta jong nga. Ki briew jong nga ki dei kiba dei eh ban batai ïa baroh kine kiei kiei”.
Halor ka jingpynroi ïa ka constituency lajong, u bah Sniawbha ula ong “Halor ki kam pynroi, Nga la pyrshang katba lah ban wanrah ïa ka roi ka par bad kane ka dei ka kamram jong nga kum u MLA”.
“Kumba, ki paidbah ka Nartiang Constituency ki kham stad bad ki tip kumno ban jied ïa la u jong u Nongïalam” ula bynrap.