Ha u bnai ban wan yn ïakynduh biang ka HPC bad ka Sorkar halor ka kam pynkynriah Kharmetor

Shillong, Jymmang 11 : Ka Sorkar Jylla kan sa shong bishar kam biang ha u bnai ban wan halor ka jingthmu pynkynriah ïa ki 342 tylli ki longïing na Them Metor, Them Iew Mawlong, kynthup ka jingïapyrkhat halor ka lad ban pyndonkam ïa ka jaka ki shipai.
ïa kane la pyntip da u Symbud Myntri Rangbah ba khmih ïa ki kam Pynroi Sor u ma Sniawbhalang Dhar haba ong “Nga tharai lashem bnai ngin sa ïashong jingïalang biang halor kane ka kam. Ngin sa pyntip sha phi” ong u Ma Sniawbha haba jubab ïa ka jingkylli halor ka jingïaid ki kam ba ïadei bad kane ka jingtyrwa.
La ka Sorkar kan thied ïa ka jaka shipai naka bynta ban shna ïing ïa kine ki longïing ka Them Metor, ula ong ba haduh mynta hi ym pat ïashim satia ïa kano kano ka rai.
“Ngin dang ban shim rai la ngi pynïaid shakhmat bad ka jaka ki shipai lada ki kloi ban ai ne la ngi pynïaid beit shakhmat ia ka kam kat kum ka blueprint bala dep pynkhreh kham hashuwa” ula ong “Ngin hap ban shim rai halor kane”.
Shwa ban leh ka sorkar kan khot ruh sa shisien ïa ka Harijan Panchayat Committee (HPC) ban ïakren sngewthuh bha halor kane ka kam.
Haba kylli la ka Defence Ministry ka la ai jubab ïa ka jingkyrpad ka Jylla, u ma Sniawbha ula ong ba ki Ophisar ki dang ap ïa ka khubor.
“Ki Ophisar jong nga ki la ïakren bad ki, kumta ngin dang ap ban ïoh ïa ka kaiphod na ki Ophisar ka Tnad Pynroi sor ïa kaei ka khubor ba khatduh ba ki ïoh na ka Ministry” ula ong .
Ka Sorkar Jylla ka la wad ïa bun ki lad ki lynti ban pynkynriah ïa ki nongshong shnong kaThem Metor kum shi bynta na ka jingthmu ban pynkylluid ïa ka thaiñ Them Iew Mawlong.