Shillong, Jymmang 11: U nongïalam shnong jong ka thaiñ Sohiong u Bah Beland Nongbri u la ong ba ha ka jingkren jong u ha ka jingïalang haba ïadei bad ka Greater Sohïong Water Supply Scheme ha kaba la ïadon lang u Lyngdoh ka Raid Nongkseh Sohïong ryngkat ki dkhot jong ka Executive Committee, ki rangbah shnong ka Raid Nongkseh Sohïong ban ïakren shaphang ka um bam um dih ha Wah Nongkseh ban shna ïa ka top um ha Lait Nongkseh kiba don ha kane hi ka thaiñ.
U Bah Nongbri u la ong ba ha kane ka jingïalang la ïa kren bun ngut ki riew rangbah bad don katto katne ngut kiba pynmih ïa ka kyrteng ka HYC Sohïong Circle bad don ruh kiba khlem pynmih ïa ka kyrteng ha kane ka jingïakren hynrei ha ka jingkren ka jong u naduh ba u sdang haduh ban da kut kam shym don ka jingpynpaw kyrteng ïa ka seng HYC halor kane ka kam sam um ha ka thaiñ.
Shuh shuh u Bah Nongbri ha ka jingkren ka jong u, u la ong ba u pyrshah bad sngewlyngngoh ïa ki katto katne ki samla kiba pyrshah ïa kane ka skhim Thup Thup bad ïa ka surok ka ban leit sha ka Dam um Thup Thup.
U la ong ba ka jingkren jong u ka thew ïa ki katto katne ki samla jong ka Raid Nongkseh kiba pyrshah ïa katei ka skhim.
Haba kren sha ki lad pathai khubor ha Shillong Press Club na ka liang utei u rangbah u la kren shai ba ka jingkdew jong u kam dei ïa ka seng HYC kumta kim dei ban sngewthuh bakla namar ha ka jingkren jong u, u khlem pynpaw ïa kata ka kyrteng ka seng HYC Sohïong Circle.
