Jowai, Jymmang 10: Ka Dorbar Shnong Chilliangraij, Jowai kum shibynta ban pyndep ïa ka rukom dustur ba la hikai da ki longshwa manshwa, hashwa ba kin leit hiar rep sha ki hali pynthor jong ki, kila ïoh ban pyndep shwa ïa ka Bamphalar jong ki mynta u snem 2026.
Ïa kane ka Bamphalar la pynlong da ka Art & Culture Committee jong ka Dorbar Shnong Chilliangraij kaba la sdang naduh ka 7 tarik bad kut haka 9 tarik mynta u bnai.
Ki drama kiba ki paidbah kila ïoh ban sakhi ha kine ki ar miet jong ka Bamphalar ka Chilliangraij ka dei ka DUHAI kaba la thoh da u K.C. Roy Pde bad ka JUBANLAK kaba la thoh da u Sumarlangki Rngad.
Ha ka miet pyni drama jong ka miet ba ar ka Bamphalar kata ha ka 8 tarik la wan ban sakhilang da u ma Thymme Pde kum u kongsan.
U ma D.H. Pde, Waheh Shnong haba ai jingkren sdang ula kyntu ïa ki khun jong ka Dorbar Shnong ban long kiba im sngi ban pynjanai ïa kane ka rukom ka dustur kaba la pynmlien da ki longshwa manshwa.
U ma Thymme Pde ha ba kren ula ïathuh ïa ka nongrim jong ka Bamphalar kaba la shim bynta da ki khun ki hajar ha ki dong bad shnong bapher bapher hapoh Jowai.
Kiwei de kiba la ai jingkren ki kynthup ïa u ma Oriland Shylla, General Secretary bad u ma Lamphrang Shylla, Secretary Art & Culture Committee.
Ïa kane ka Bamphalar la pynkut haka 9 tarik ha kaba ka la don ka jingïabam khana ha Iungwalieh (Hall) da ka jingïashim bynta jong baroh ki khun ka Dorbar Shnong.
