Khliehriat, Jymmang 10: Ka kynhun State Disaster Response Force (SDRF) tang shu ioh jingtip ha ka miet Sngi Saitjan janmiet halor ka jingdon jong ka metïap ba la per ha kawei ka krem dewiong bym trei kam shuh ha ka shnong Mulaibrisumer kaba hap hapoh ka Mooriap Border Out Post, East Jaintia Hills District, mar mar kila leit ban sei noh ïa ka met.
Ka kynhun jong ka SDRF hapoh ka jingialam u Sub-Inspector D. Kharbhih kila mih na Headquarter mynta ka sngi ha ka por 05:30 baje mynstep bad kila poi ha ka jaka ba jia ka jingjia ha ka por kumba 10:30 baje eiei.Mar ïa poi, ka kynhun ka la sdang ban ioh sei noh ïa ka met.
Da ka jingiarap jong ka QRT Civil Defence Khliehriat, lai ngut ki dkhot ka SDRF, kiba kynthup ia u G/M F. Shangrit, u G/M A. Dhar, bad u G/M M. Chyrmang, ki la hiar shapoh katei ka krem dewiong ba la iehnoh ryngkat bad ka jingkyrshan jong ka ki kor ka juk myta (crane system) ban sei ïa katei ka met kaba la per ha sla um.
Ha ka por kumba 11:15 baje, ka kynhun ka la lah ban sei ïa ka met jong uwei u shynrang bym lah ban ithuh, uba la antad ba u don hapdeng ka rta kaba 30-40 snem.
Hadien ka jinglah ban sei ïa ka met ïap, la aiti noh sha ki bor Pulit ban pyndep ïa ki kyndon ain bad ka jingtohkit kaba donkam.
Ka SDRF ka ai khublei ïa ka jingtreilang jong baroh ki briew kiba donkti ha ka jingtreikam bad ka pynpaw biang ïa ka jingkular jong ka ban ai jingiarap kloi ha ki por ba donkam kyrkieh bad na ka bynta ka jingshngain jong ki paidbah.
Kum ban shu kdew ba u Superintendent of Police East Jaiñtia Hills District, u Pankaj Kumar Rasgania, IPS u la iathuh ba ha ka sngi Saitjain la lap ïa kawei ka met iap na kawei ka thliew dewïong ka bym pyndonkam shuh ba la shu iehnoh shrah kaba don ha Moolait Bri Sumer East Jaiñtia Hills District.
Shuh shuh la ong ba ki pulit kim pat sei ïa katei ka met kaba don hapoh ka thliew kaba per halor sla um bad hap ban ap haduh ban wan sei da ka kynhun SDRF namar ka thliew dewïong ka dei kaba jylliew kaba don bad ka um.
